Unnur Ösp til liðs við Kaptio

Unnur Ösp Ásgrímsdóttir hefur verið ráðin forstöðumaður vörustjórnunar og hönnunar hjá hugbúnaðarfyrirtækinu Kaptio. Unnur hefur síðastliðið ár starfað hjá Sendiráðinu sem yfirmaður stafrænnar notendaupplifunar. 

Hún hóf feril sinn í hönnun og þróun stoðtækja hjá Össuri og færði sig síðan yfir til hugbúnaðarfyrirtækisins Tempo, þar sem hún starfaði í tæp sex ár. Hjá Tempo leiddi Unnur teymi á sviði notendaupplifunar, ásamt því að taka þátt í vörustjórnun, vöruhönnun og stefnumótun, að því er fram kemur í tilkynningu.

Unnur er með M.Sc. í iðnhönnun frá Álaborgarháskóla í Danmörku. Hún er gift Kristóferi Gunnlaugssyni, hagfræðingi hjá Seðlabankanum, og eiga þau fjögur börn.

„Það eru áhugaverðir tímar í ferðatæknibransanum og ég er gríðarlega spennt fyrir því að koma inn í kraftmikið teymi hjá Kaptio. Ég vonast til að geta nýtt mína reynslu til þess að móta skapandi vöruteymi sem byggir þróun á sterkri vörustefnu, þörfum viðskiptavina og framúrskarandi notendaupplifun,“ er haft eftir Unni í tilkynningu.

• Blogga um frétt