Innlent | mbl | 16.2.2022 | 7:00 | Uppfært 30.12.2022 12:45

Vill skoða notkun rafbyssa alvarlega

Jón Gunnarsson dómsmálaráðherra segist ekki telja að komið sé að því að almennir lögreglumenn eigi að bera skotvopn hér á landi. Enn sannfærðari segist hann vera eftir samtöl við lögreglu og sérfræðinga um að áfram geti íslenskur almenningur upplifað sig í öruggu samfélagi.

Þetta segir hann í Dagmálum þar sem hann er gestur Karítasar Ríkharðsdóttur og ræðir meðal annars lögreglumál og vopnaburð lögreglu, almannavarnir, réttarstöðu þolenda í kynferðisafbrotamálum og útlendingamál.

„Hefur hentað mér að hlaupa hratt“

Jón vísar þannig í umræðuna sem skotið hefur upp kolli eftir að lögreglan hefur verið kölluð út í nokkur skotárásarmál á höfuðborgarsvæðinu á stuttum tíma. Tvær slíkar áttu sér stað í síðustu viku þar sem ungir menn eru í varðhaldi fyrir að hafa staðið að skotárás.

Frétt af mbl.is

Enginn eldri en tvítugur

„En það eru umræður um það hvort að við ættum að ganga það milliskref að vopna lögregluna með svokölluðum rafbyssum,“ segir Jón og bætir við að reynsla annarra þjóða af því hafi verið góð, svo sem í Bretlandi og hjá öðrum Norðurlandaþjóðum.

Hann segist vilja skoða slíkt verklag alvarlega, reynslan sýni að það geti dregið úr slysatíðni þolenda og lögreglumanna. Fyrir liggi í ráðuneytinu að leggjast yfir nýútkomna skýrslu um verklagið í Noregi.

Skipulag í brotastarfsemi að aukast

Pólitíkin klári umræðuna um glæpastarfsemi

„Það sem er undir hérna er öryggi borgaranna, sem er algjört grundvallaratriði,“ segir Jón. „Lögreglan hefur ítrekað bent okkur á það á undanförnum árnum, nokkuð mörgum árum, að það sé að skjóta rótum skipulögð glæpastarfsemi á Íslandi. Það má segja að pólitíkin hafi tekið þá umræðu og einhvern veginn náð að klára hana. Það sem liggur undir í þeim efnum eru auknar heimildir lögreglu til eftirlits og rannsókna,“ segir hann enn fremur.