Blaðamenn eigi skilið vernd og stuðning

Þegar blaðamenn eru komnir með stöðu grunaðra hjá lögregluyfirvöldum fyrir það eitt að segja fréttir vakna áleitnar spurningar um stöðu lýðræðisins. Þetta segir Drífa Snædal, forseti ASÍ, í pistli sínum sem ber yfirskriftina „Að beita valdi og múlbinda“.

Frétt af mbl.is

Lögreglan boðar blaðamenn í yfirheyrslu

Hættulegt lýðræðinu og frjálsum fjölmiðlum

Í pistlinum segir Drífa erfitt að sjá af þeim upplýsingum sem lögreglan láti frá sér að förin gegn blaðamönnum sem sögðu fréttir af skæruliðadeild Samherja sé til neins annars en að leggja fyrirhöfn og kostnað á blaðamenn, hugsanlega til að vera öðrum víti til varnaðar.

„Þannig er það hættulegt lýðræðinu og frjálsum fjölmiðlum þegar ríkisvaldið beitir sér með þessum hætti. Blaðamenn sem skrifa gegn stjórnmála- eða peningavaldinu eiga skilið vernd og stuðning frá samfélagi sínu, sú vernd er að hluta til bundin í lög, en hún er ekki nóg ein og sér. Það er því skylda þeirra sem vilja verja lýðræðið að tala gegn þöggun, sérstaklega þegar ríkisvaldið beitir henni.“

Frétt af mbl.is

Lögregla segir málið í hefðbundnum farvegi

Þekkt þöggunarleið að ráðast á persónur

Það sé þekkt leið til að þagga niður umræður að ráðast persónulega gegn þeim sem setji fram erfiðar spurningar, að sögn Drífu. Með því fælist fólk frá umræðunni og forðist jafnvel að setja sig inn í þau átök sem eigi sér stað. Nefnir hún samfélagsmiðla sem dæmi um tæki sem hafi verið notuð til slíks, þ.e. að rægja fólk og ætla þeim allt hið versta. Samfélagsmiðlar séu þó jafnframt vettvangurinn þar sem baráttan gegn ofbeldi eigi sér stað. Þar geti fólk sem hefur sögu að segja eða hefur verið ebitt órétti komist í samband við annað fólk á sama stað, sagt frá og notið stuðnings.

Þá segir hún verkalýðshreyfinguna ekki hafa farið varhluta af valdabaráttunni undanfarið, þar sem farið er hart fram gegn einstaklingum, þeir tortryggðir og jafnvel rægðir. Oft hafi verið erfitt að festa hönd á hinn málefnalega ágreining og harkan í umræðunni oft orðið til þess að fólk veigri sér við að fara fram á ritvöllinn, fólk sem hafi ýmislegt til málanna að leggja en vilji ekki taka þátt í óvæginni umræðu.

Frétt af mbl.is

Lýsa áhyggjum og undrun á aðgerðum lögreglunnar

„Valdbeitinguna eigum við að forðast“

„Við sem förum fyrir fjöldahreyfingu fáum einmitt þessa dagana fjölda áskorana að leggja niður vopn innan hreyfingarinnar, snúa bökum saman og berjast fyrir sameiginlegum hagsmunum. Með því er ekki sagt að við getum ekki tekist á um stefnur og strauma, jafnvel verið harkalega ósammála.

En valdbeitinguna eigum við að forðast og halda okkur við málefnin, ekki persónur. Verkalýðshreyfingin þarf nefnilega að lifa okkur öll sem störfum innan hennar í dag. Við verðum að rísa undir þeirri ábyrgð.“

• Blogga um frétt