Ragn­ar Freyr Ingvars­son, sér­fræðing­ur í lyf- og gigt­ar­lækn­ing­um og fyrr­ver­andi yf­ir­maður Covid-göngu­deild­ar Land­spíta­la, veltir því upp hvort Landspítali ætti að kalla einkennalaust Covid-sýkt starfsfólk til vinnu þar sem mikil mannekla ríkir á spítalanum. 

Starfs­menn spít­al­ans í ein­angr­un eru nú 480 talsins. Þeir hafa aldrei verið fleiri, en Covid-sýkt­um starfs­mönn­um hef­ur fjölgað ört síðustu viku. Þórólfur Guðnason sóttvarnalæknir hefur sagt það vera algjört neyðarúrræði að kalla fólk úr einangrun.

Frétt af mbl.is

Hátt í 500 Covid-sýktir starfsmenn

Frétt af mbl.is

Neyðarúrræði að kalla fólk úr einangrun

Guðlaug Rakel Guðjónsdóttir, settur forstjóri Landspítalans, hefur sagt að sér þyki ekki til­efni til að kalla starfs­menn úr ein­angr­un í vinnu þar sem erfitt er að tryggja að smit ber­ist ekki í sjúk­linga þrátt fyrir mikla manneklu á spítalanum. 

Hún segir það á ábyrgð spít­al­ans að forða sjúk­ling­um frá smiti og að ekki sé hægt að hleypa veirunni lausri vís­vit­andi inn­an stofn­un­ar­inn­ar. 

Frétt af mbl.is

Flókið að fá Covid-sýkt starfsfólk til vinnu

Ragnar Freyr tekur ekki í sama streng og hvetur stjórnvöld til að horfa til nágrannaþjóða sem hafa glímt við sama vanda.

„Eftirfarandi aðgerðir hafa verið innleiddar með góðum árangri og án skaða fyrir sjúklinga: Einangrun starfsmanna hefur verið stytt í 4-5 daga, sóttkví vegna smits á heimili hefur verið aflögð (starfsmenn taka hraðpróf fyrir vaktir), einkennalausir kallaðir til vinnu og hætt hefur verið að prófa heilbrigt fólk með PCR prófi,“ segir Ragnar Freyr í færslu á Facebook.