Almennri notkun PCR-prófa var hætt í dag. Þannig er ekki lengur í boði fyrir almenning með einkenni sem benda til smits af völdum Covid-19 að panta PCR-sýnatöku heldur eru hraðgreiningapróf einungis í boði.
Þetta staðfestir Sigríður Dóra Magnúsdóttir, framkvæmdastjóri lækninga hjá heilsugæslunni á höfuðborgarsvæðinu, í samtali við mbl.is.
Hámarki PCR-greiningargetu vegna Covid-19 var náð fyrir nokkru síðan sem leiddi til þess að bið eftir niðurstöðu úr PCR-greiningum var orðin allt að 3 sólarhringar, sem er óásættanleg, að því er kom fram í tilkynningu frá sóttvarnalækni í gær. Til að bregðast við þessu hafi svo verið ákveðið að hætta almennri notkun PCR-prófa.
„En við getum náttúrulega tekið þau á læknisfræðilegum forsendum,“ segir Sigríður.
Spurð segir hún það einnig eiga við um þá einstaklinga sem hafa nýlega fengið óvissa niðurstöðu á PCR-prófi.
„Það fólk er að fara aftur í próf en það þarf þá að hafa samband við sína heilsugæslu til að fá beiðni fyrir því.“
Þá verði PCR-próf áfram í boði fyrir þá sem þurfa á neikvæðum niðurstöðum slíkra prófa að halda vegna ferðalaga erlendis en þá gegn gjaldi.
Samkvæmt tilkynningu frá sóttvarnalækni er bæði hægt að panta tíma í hraðgreiningapróf hjá heilsugæslunni í gegnum Heilsuveru og hjá þeim einkafyrirtækjum sem bjóða upp á hraðgreiningapróf. Prófið er einstaklingum að kostnaðarlausu.
Jákvætt hraðgreiningapróf mun því nægja til greiningar á Covid-19 og ekki verður þörf á staðfestingu á greiningunni með PCR-prófi.
Prófanir á vegum heilsugæslunnar munu eftir sem áður fara fram á Suðurlandsbraut 34, segir Sigríður innt eftir því.
Þeim sem nú greinast með COVID-19 á hraðgreiningaprófi er ekki skylt að dvelja í einangrun en engu að síður eru tilmæli sóttvarnayfirvalda þau, að fólk dvelji í einangrun í 5 daga. Ef fólk er einkennalítið eða einkennalaust þá getur það mætt til vinnu en fari þá eftir leiðbeiningum um smitgát í 5 daga.
Samkvæmt núgildandi reglugerð um einangrun, sem fellur úr gildi á miðnætti í kvöld, þá er þeim sem greinast með PCR-prófi hins vegar skylt að dvelja í einangrun í a.m.k. 5 daga.