Innlent | mbl | 28.2.2022 | 14:49

Óheimilt að veita blaðamanni réttarstöðu grunaðs

Fjórir blaðamenn fengu réttarstöðu sakborninga. Samsett mynd

Héraðsdómur Norðurlands eystra hefur komist að þeirri niðurstöðu að lögreglustjóranum á Norðurlandi eystra hafi ekki verið heimilt að veita Aðalsteini Kjartanssyni, blaðamanni Stundarinnar, réttarstöðu sakbornings í rannsókn vegna umfjöllunar um skæruliðadeild Samherja.

Frétt af mbl.is

„Þetta er eitthvað agenda lögreglunnar“

Hann mun því ekki þurfa að mæta til skýrslutöku hjá lögreglu vegna málsins. Þetta staðfestir Gunnar Ingi Jóhannsson, lögmaður Aðalsteins, í samtali við mbl.is, en Stundin greindi fyrst frá.

Þrír aðrir blaðamann fengu réttastöðu sakbornings vegna málsins, en Gunnar gerir ráð fyrir að úrskurðurinn nái til þeirra líka.

Fékk aldrei síma Páls í hendurnar

Lögreglustjórinn á Norðurlandi eystra hafði boðað blaðamennina fjóra til skýrslutöku í tengslum við rannsókn á broti gegn friðhelgi einkalífsins, en Aðalsteinn ákvað að láta reyna á lögmæti aðgerða lögreglu.

Frétt af mbl.is

Grunuð um dreifingu klámefnis

Þegar lögregla lagði fram greinargerð sína fyrir dómi í síðustu viku kom í ljós að blaðamennirnir voru grunaðir um að hafa dreift kynferðislegu efni með því að afrita gögn og senda úr síma Páls Steingrímssonar, skipstjóra Samherja, sem var hluti af skæruliðadeildinni. En í símanum voru myndbönd af Páli í kynlífsathöfnum.

Gunnar sagði í samtali við mbl.is í síðustu viku að Aðalsteinn hefði aldrei fengið síma Páls í hendurnar og því aldrei séð áðurnefnd kynlífsmyndbönd. Hann hefði einungis séð þau gögn úr símanum sem hann skrifaði um.