Ellefu ára íslenskur lávarður

Ellefu ára gamall Reykvíkingur, Arnaldur Kjárr Arnþórsson, festi á dögunum kaup á landspildu í Skotlandi. Hvernig í ósköpunum ætli það hafi komið til?

„Ég var að horfa á YouTube og rakst á einhverjar tuskudúkkur sem kölluðu sig lávarða vegna þess að þær áttu land í Skotlandi. Mér fannst þetta strax mjög spennandi og vildi rosa mikið kaupa land þarna líka. Ég fór því að gúgla þetta og rakst á frábæran Valentínusardíl, þar sem afslátturinn var 80%. Það var of gott til að sleppa.“

– Hvað er þetta stórt land?

„Fimm „square“ fet. Það er um einn og hálfur fermetri.“

– Og hvað borgaðirðu fyrir það?

„40 dollara.“

Móðir Arnaldar, Elísabet Ólafsdóttir, frétti af þessum áformum með eftirfarandi hætti: „Hann sendi mér og pabba sínum skilaboð: „Ég ætla að kaupa land í Skotlandi!“ Áttu fyrir þessu? spurðum við á móti. „Já, látum þetta gerast!““

Og kaupin gerðust. Dagsatt. Arnaldur tekur upp símann, velur hnitin í Google Maps og sýnir mér landið, nálægt örnefninu Ardallie.

Arnaldur ásamt móður sinni, Elísabetu Ólafsdóttur. mbl.is/Kristinn Magnússon

Þetta er ekkert svindl

Móðir hans er ekki alveg sannfærð um að téð spilda sé í reynd á forræði Arnaldar. „Ég veit ekki alveg hvað myndi gerast ef við mættum þarna. Myndi ekki bara einhver skoskur afdalabóndi koma og reka okkur í burtu?“ spyr hún og fer með nokkur vel valin skosk blótsyrði – með lygilega góðum hreim. „Annars ætlum við ekkert að rannsaka hvort þetta sé svindl.“

Sonur hennar horfir gáttaður á hana: „Þetta er ekkert svindl!“

Annars er það svo sem akademískt. Arnaldur hefur engin áform um að yrkja landið eða færa sér það á nyt með öðrum hætti. „Ég keypti þetta land bara fyrir nafnbótina. Núna er ég í fullum rétti þegar ég bið fólk um að kalla mig lávarð. Lávarður Arnaldur Kjárr.“

Jess sör! segi ég nú bara. Það verður ekki mikið tilkomumeira.

Mér verður litið á móður hans sem segir: „Er nokkuð annað í stöðunni en að kalla hann lávarð?“

Það held ég ekki.

Arnaldur viðurkennir þó að lávarðstignin hafi í reynd ekki mikla þýðingu hér heima. „Þetta er aðallega skemmtilegt. Flestir vinir mínir kalla mig þó enn þá bara Arnald.“

Fjögurra ára afmæli Arnaldar eftir hans höfði. Með honum eru foreldrarnir, Elísabet og Arnþór Snær Sævarsson, og litli bróðir, Patrekur Kjárr.

Vill komast lifandi til Valhallar

– En þarftu ekki að prófa að búa í Skotlandi í framtíðinni?

„Jú, það gæti verið gaman að búa í Skotlandi í hálft ár eða í mesta lagi ár. Þá gæti ég sagt við fólk: I am lord, you shall bow to me! Annars verður Ísland alltaf staðurinn fyrir mig, nema þá að ég finni leið til að fara til Valhallar – án þess að vera dauður!“

Það er nefnilega það. Arnaldur er nefnilega mikill áhugamaður um norræna goðafræði og gekk í Ásatrúarfélagið eftir að hafa lesið Hvísl hrafnanna, þrjú hnausþykk bindi fyrir unglinga þegar hann var 10 ára.

Þið getið fræðst betur um það í Sunnudagsblaði Morgunblaðsins.