Innlent | mbl | 7.3.2022 | 21:23

Útilokar ekki breytingar á loftrýmisgæslu

Þórdís Kolbrún Reykfjörð Gylfadóttir utanríkisráðherra. mbl.is/Kristinn Magnússon

Þórdís Kolbrún R. Gylfadóttir utanríkisráðherra útilokar ekki að einhverjar breytingar verði gerðar á loftrýmisgæslu á Íslandi í ljósi breyttrar heimsmyndar vegna stríðsins í Úkraínu.

Hún segir þörf á viðverandi loftrýmisgæslu ekki hafa verið tekin til formlegrar umræðu en henni þykir líklegt að endurskoðun á núverandi fyrirkomulagi verði rætt.

Flugherinn fer í lok mánaðar

Frá því að bandaríkjaher fór árið 2006 hefur loftrýmisgæsla verið viðhöfð fjórum til þrisvar sinnum á ári hér á landi. Portúgalski flugherinn hefur annast loftrýmisgæslu Atlantshafsbandalagsins (NATO) undanfarinn mánuð en mun ljúka starfi sínu í lok mars. Samkvæmt núverandi áætlun mun næsti flugher taka við í sumar.

„Það að varnaráætlanir NATO, allar fimm, hafi verið virkjaðar felur í sér möguleika á aukinni viðverðu þannig að loftrýmisgæsla er eitt af því sem getur komið til umræðu. En það hafa engar ákvarðanir verið teknar um breytingar á því fyrirkomulagi sem hefur verið um árabil,“ segir Þórdís í samtali við mbl.is.

Listinn ekki verið staðfestur

Fyrr í dag greindi mbl.is frá því að Ísland væri komið á lista Rússa yfir óvinveittar þjóðir, eða lista yfir „erlend ríki og landsvæði sem fremja óvinveittar aðgerðir gegn Rússlandi, fyrirtækjum þess og borgurum“.

Aðspurð segir Þórdís ráðuneytið ekki hafa fengið staðfestingu þess efnis að Ísland væri á listanum. Aftur á móti hafi þau lesið um það í fjölmiðlum og segir hún Ísland í ágætum félagsskap á listanum, séu þar meðal annars Norðurlandaþjóðirnar.