Innlent | mbl | 27.3.2022 | 12:52 | Uppfært 15.6.2022 13:42

Sá sögulegt ávarp Bidens fyrir einskæra tilviljun

Afdráttarlaus ummæli forsetans vöktu mikla athygli. Arnar Þór Ingólfsson varð vitni af þeim. Samsett mynd

Arnar Þór Ingólfsson, blaðamaður hjá Kjarnanum sem er staddur í Varsjá, varð fyrir einskæra tilviljun vitni að sögulegu ávarpi Joe Bidens Bandaríkjaforseta í gærkvöldi.

Í lok ræðu sinnar sagði Biden að Vladimír Pútín Rússlandsforseti gæti ekki verið áfram við völd í Kreml.

Afdráttarlaus ummæli forsetans vöktu mikla athygli og þóttu gefa til kynna sögulega stefnubreytingu Bandaríkjanna gagnvart Rússlandi. Hvíta húsið dró úr ummælunum stttu síðar.

Frétt af mbl.is

Söguleg stefnubreyting dregin til baka

Arnar segist hafa verið staddur á torginu fyrir utan og að erfitt hafi verið að fá formlegan fjölmiðlapassa á viðburðinn.

„Mér var sagt að það yrði sennilega ekki mögulegt. Síðan kom bara kona frá hvíta húsinu og henti í mig miða.“

Hann segir fleiri á torginu, til að mynda úkraínskt flóttafólk sem hann hafði rætt við, einnig hafa fengið miða.

„Það var greinilega verið að fylla viðburðinn af fólki svo það væri ekki tómlegt á að líta.“

Því var um óvænta upplifun að ræða.

„Ég bjóst ekki við þessu, það var ekki á planinu að fara að horfa á Biden tala þarna í gærkvöldi. En það var voða gaman af því, þetta var ágætis ræða hjá karlinum.“

Þúsundir í tímabundnum úrræðum

Arnar segir, spurður um stöðuna í Varsjá, að þar sé gríðarlegur fjöldi flóttamanna og samtök sem veiti fólki aðstoð.

„Það kom mér eiginlega á óvart hvað það eru rosalega mörg samtök, aðallega frá Evrópu, sem eru eiginlega bara að sækja fólk. Samtök, sem koma hérna með rútur og fylla þær af fólki, sem eru í samstarfi við borgaryfirvöld og taka flóttafólk til sinna heimkynna.“

Ekki veitir af, enda eru þúsundir flóttafólks í tímabundnum úrræðum. Það fólk viti að það þurfi á endanum að fara annað en viti ekki hvert.

„Flestir náttúrulega vona að stríðið fari að klárast svo fólk geti snúið heim sem fyrst.“