Boeing 757-vél Icelandair var í dag nýtt í innanlandsflug til Akureyrar á vegum félagsins.
mbl.is barst nokkur fjöldi ábendinga vegna lágflugs farþegaþotu yfir Reykjavík, en slíkt kemur ekki oft fyrir.
„Við erum að nýta Boeing 757-vél í innanlandsflugið hjá okkur í dag og á morgun. Það var í dag ein ferð til Akureyrar og til baka í dag, og verður aftur á morgun,“ segir Ásdís Ýr Pétursdóttir, upplýsingafulltrúi Icelandair.
„Það er mikið bókað í innanlandsflugið hjá okkur fyrir helgina og tvær af þeim vélum sem við nýtum í innanlandsflugið eru í viðhaldi, svo þess vegna brugðum við á þetta ráð að nýta stóra vél,“ bætir Ásdís við.