Bíllinn alelda á örskotsstundu

Litlu mátti muna í gærkvöldi þegar Kristinn Már Þorsteinsson frá Dalvík lagði af stað að sækja elstu dóttur sína til Akureyrar, þegar bíll hans varð alelda á örskotsstundu.

 „Ég er að keyra hérna upp hálsinn í átt að Akureyri þegar ég finn svona gúmmí eða rafmagnsbrunalykt sem er erfitt að lýsa. Ég slekk á hitanum í stýrinu og sætinu og fer að fikta í miðstöðinni en lyktin fer ekkert.“

Heyrði snarka í mælaborðinu

Þegar Kristinn opnaði bílrúðurnar sér hann reyk liðast upp frá stýrinu um leið og trekkurinn kemur inn. „Það var innskot þarna við veginn og ég fer þangað og drep á bílnum. Þá heyri ég snarkla í mælaborðinu og held að það sé kviknað í vélinni og fór út og opnaði húddið en sá ekkert. En þegar ég er að fara aftur inn í bílinn sé ég speglun af eldglæringum hjá pedölunum og átta mig á því að það var kviknað í undir mælaborðinu og stýrinu.“

Enn sleginn en þakklátur að ekki fór verr

Kristinn hætti við að fara inn í bílinn og kom sér í örugga fjarlægð og hringdi í 112. Hann var vart búinn að hringja þegar bíllinn verður alelda. „Ég hafði ætlað að bjarga einhverju drasli úr bílnum, en það gekk ekki og það brunnu tveir barnabílstólar í bílnum.“

Lögreglan og slökkvilið mætti fljótt á svæðið og tóku skýrslu, en Kristinn segist enn sleginn yfir þessu. „Ég hafði fyrr um daginn verið að keyra sex ára dóttur mína og vinkonu hennar í bílnum, og má ekki til þess hugsa að þær hefðu verið í hættu.“

• Blogga um frétt