Sigurður Ingi neitaði að tjá sig við fjölmiðla

Sigurður Ingi Jóhannsson, innviðaráðherra og formaður Framsóknarflokksins, vildi ekki tjá sig frekar um ummæli sín í garð Vigdísar Häsler, framkvæmdastjóra Bændasamtakanna, þegar fjölmiðlar ætluðu að ræða við ráðherrann að loknum ríkisstjórnarfundi í morgun.

Vísaði hann þess í stað í yfirlýsingu sína um málið sem hann skrifaði á Facebook í gær. 

Vigdís greindi frá því á facebook-síðu sinni í gær að Sigurður Ingi hefði látið niðrandi ummæli falla um hana á flokkaþingi í tengslum við Búnaðarþing síðastliðinn fimmtudag.

„Starfs­fólk Bænda­sam­tak­anna óskaði eft­ir því að innviðaráðherra og fleiri væru með í mynda­töku sem ég kom síðar að. Þar voru afar sær­andi um­mæli lát­in falla og heyrði bæði ég það sem og starfs­fólk sam­tak­anna,“ skrif­aði Vig­dís.

Frétt af mbl.is

„Afar særandi ummæli látin falla“

Ingveldur Sæmundsdóttir, aðstoðarmaður ráðherra, sagði hann ekki hafa notað slík orð og að hún hefði staðið við hlið hans.

„Aðstoðarmaður ráðherr­ans var ekki við hlið hans þegar um­mæl­in voru lát­in falla, eins og hún hef­ur haldið fram en mynd­ir úr þess­ari mynda­töku sýna það án alls vafa. Það er sær­andi þegar reynt er að gera lítið úr upp­lif­un minni og þegar bein­lín­is rang­ar skýr­ing­ar eru notaðar við það. Ég stend með sjálfri mér þegar kem­ur að þessu, ég veit hvað ég heyrði, ég veit hvað var sagt. Ég neita að bera ábyrgð á þeim orðum sem ráðherr­ann viðhafði í minn garð. Duld­ir for­dóm­ar eru gríðarlegt sam­fé­lags­mein og grass­era á öll­um stig­um sam­fé­lags­ins. Þeir smætta verk ein­stak­linga og gjörðir niður í lit eða kyn,“ skrif­aði Vigdís.

Frétt af mbl.is

Sigurður Ingi: „Mér verður á eins og öðrum“

Í stuttri yfirlýsingu sinni á Facebook í gær sagði Sigurður að sér yrði á eins og öðrum.

„Í líf­inu er maður alltaf að læra á sjálf­an sig. Sárt er þó að sá lær­dóm­ur bitni á til­finn­ing­um annarra.“

Sigurður Ingi hringdi enn fremur í Brynju Dan, varaþingmann flokksins, í gær og ræddi ummælin við hana.

Brynja sagði í Morgunútvarpinu á Rás 2 í morgun að hún neiti því ekki að þetta sé sárt, ömurlegt og glatað. Henni hafi liðið illa í allan gærdag og sé að melta þetta. Sigurður Ingi sé fullur iðrunar og svekktastur út í sjálfan sig.

• 1 blogg um fréttina

Bloggað um fréttina

• Jóhann Elíasson: VÆRI EKKI NÆR AÐ ALÞINGISMENN FJÖLLUÐU UM MÁL SEM SKIPTA …