Innlent | mbl | 6.4.2022 | 21:39

Kviku Reykjavíkurmótið hófst í dag

Eggert Jóhannesson

Alþjóðlega Reykjavíkurskákmótið var sett í dag í Hörpu og var margt um manninn. Alls taka 270 keppendur þátt í mótinu frá 45 löndum, þar af 24 stórmeistarar. Dagur B. Eggertsson borgarstjóri setti mótið og lék fyrsta leikinn fyrir stigahæsta mann mótsins, Pouya Idani frá Íran (2638).

Indverjar og undrabarn

Bandaríski stórmeistarinn Hans Niemann er næststigahæstur keppanda ásamt Gukesh D. frá Indlandi (2637), en Indverjar eru í fimm af sjö efstu sætum mótsins og eru líklegir til stórræða. Yngsti stórmeistara allra tíma, bandaríska undrabarnið, Mishra Abhimanyu er meðal keppenda en hann er aðeins 13 ára.

Hjörvar Steinn Grétarsson sem er stigahæstur íslensku keppendanna á Reykjavíkurmótinu í fyrra. Eggert Jóhannesson

Fimm íslenskir stórmeistarar

Stigahæsti skákmaður Íslendinga, Hjörvar Steinn Grétarsson (2542) tekur þátt og íslensku stórmeistararnir Héðinn Steingrímsson (2538), Jóhann Hjartarson (2465), Þröstur Þórhallsson (2422) og Bragi Þorfinnsson (2381), en alls taka um 70 Íslendingar þátt í mótinu.

Skákkonur áberandi

Stórmeistari kvenna, Lenka Ptácníková (2186) fer fremst íslenskra skákkvenna, en næstar eru Hallgerður Helga Þorsteinsdóttir (1981) og Jóhanna Björg Jóhannsdóttir (1973), en alls taka níu íslenskar skákkonur þátt í mótinu.

Úkraínska skákkonan, Evgenía Doluhanóva var með naglalakk með fánalitum lands síns. Eggert Jóhannesson

Skákkonur eru áberandi á mótinu og Tania Sachdev frá Indlandi 2392), Sukandar Irine Kharisma frá Indónesíu (2386) og frá Úkraínu eru landsliðskonurnar Evgenía Doluhanóva (2280) og Mariia Berdnyk (2287). Dóttir Piu Cramling sem gerði garðinn frægan fyrir löngu, Anna Cramling, frá Svíþjóð (2057) er einnig meðal keppenda.

Umferðir mótsins hefjast kl. 15 í Hörpu og hægt er að fylgjast með skákskýringum frá kl. 17.

Óvænt úrslit úr 1. umferð

Óvænt úrslit í dag voru þau að Alexander Oliver Mai gerði jafntefli við undrabarnið, bandaríska stórmeistarann Mishra Abhimanyu, og einnig gerði Birkir Ísak Jóhannsson (2117) jafntefli við gömlu kempuna Oleg Romanishin (2415) frá Úkraínu. Einnig tapaði Þröstur Þórhallsson fyrir mun stigalægri manni í dag, Rafael De Koninck (2119) frá Belgíu.

Hér er hægt að sjá niðurstöður 1.umferðar í heild.