Fjögur ár fyrir mansal á stjúpbörnum sínum

Íslensk kona hefur verið dæmd í fjögurra ára fangelsi fyrir mansal og brot í nánu sambandi gagnvart fjórum stjúpbörnum sínum. Hún var sökuð um að hafa haft þau í nauðungarvinnu þegar þau voru börn að aldri. Þetta er fyrsti dómurinn í mansalsmáli síðan árið 2010 og sá fyrsti eftir að lögum um mansal var breytt á síðasta ári.

Kolbrún Benediktsdóttir varahéraðssaksóknari staðfestir í samtali við mbl.is að dómurinn hafi fallið á fimmtudaginn, en hann hefur ekki enn verið birtur á vef Héraðsdóms Reykjaness.

Voru í vinnu hjá fyrirtæki sem konan stýrði

Konan var gift föður barnanna og var í ákæru sögð hafa flutt börnin til landsins. Þá var hún sögð hafa hýst þau og útvegað þeim vinnu hjá fyrirtæki þar sem hún var verkstjóri og stýrði daglegum rekstri. Sagði í ákærunni að þrjú barnanna hefðu verið látin vinna allt að þrettán klukkustundir á dag, sex til sjö daga í viku. Fjórða barnið hafi hins vegar unnið í allt að tvær klukkustundir, þrjá daga vikunnar. Laun barnanna, sem metin voru á rúmar 16 milljónir, átti konan að hafa nýtt í eigin þágu.

Frétt af mbl.is

Íslensk kona ákærð fyrir mansal

Kolbrún segir að málið hafi mikla þýðingu, enda sé það fyrsti dómurinn um mansal síðan fimm menn frá Litháen voru dæmdir í 4-5 ára fangelsi fyrir að hafa svipt unga konu frelsi sínu í þeim tilgangi að láta hana leggja stund á vændi hér á landi.

Að mati Kolbrúnar verður fróðlegt að lesa dóminn þegar hann verður birtur, enda byggi hann á nýlega uppfærðum lögum um mansal. Segir Kolbrún mansalsmál snúin og að almennt þurfi að hafa þrennt í huga þegar sakfellt er fyrir slíkt. Í fyrsta lagi þurfi að sanna verknað, í öðru lagi verknaðaraðferð og í þriðja lagi þurfi að liggja fyrir tilgangur. Með börn, eins og í þessu tilviki, skiptir verknaðaraðferðin ekki máli, heldur nægir að sanna verknað og tilgang þannig að um mansal sé að ræða.

Frétt af mbl.is

5 ára fangelsi fyrir mansal

• Blogga um frétt