Ungstirnin sækja í Hörpu

Ungstirni eru tíðir gestir á Kviku Reykjavíkurskákmótinu sem lauk í fyrrdag með sigri sextán ára indverska stórmeistarans Rameshbabu Praggnanandhaa. Hjörvar Steinn Grétarsson stórmeistari varð á meðal þeirra sem skiptu með sér 2.-5. sæti.

„Það sem við höfum gert á Reykjavíkurskákmótinu er að fá ungstirni til þess að koma hingað. Magnus Carlsen er til dæmis á meðal þeirra skákmanna sem komu hingað kornungir,“ segir hann. Praggnanandhaa keppti í Reykjavíkurskákmótinu árin 2017 og 2018 og 2019 en 2018 mætti hann Vigni Vatnari Stefánssyni, einum efnilegasta skákmanni okkar Íslendinga. Var Pragnggnanandhaa þá með 2.447 elo-stig en Vignir 2341; nú er hinn fyrrnefndi kominn upp í 2.624 elo-stig og Vignir 2.501 en hann vantar aðeins einn áfanga til þess að ná stórmeistaratitlinum.

Vignir Vatnar Stefánsson teflir við Ramesh Praggnanandhaa árið 2018. Þá var Vignir Vatnar 15 ára gamall og Praggnanandhaa 12 ára. mbl.is/Ómar Óskarsson

Það er margt sem trekkir skákmenn að Reykjavíkurskákmótinu og hefur það fest sig í sessi sem eitt virtasta opna skákmótið á heimsvísu.

Hvað er það við mótið sem heillar?

„Menn segja að standardinn á mótinu sé svo svakalega hár miðað við erlendis, án þess að maður vilji fara að monta sig. Amatörar í skákinni eru ekkert vanir þessu,“ segir Gunnar Björnsson, forseti Skáksambandsins. Þá finnst mörgum skákmönnum einstakt að tefla með útsýni út á sjó. „Síðan er náttúrlega hávaðinn sem er þarna. Á hverju ári er alltaf einhver truflun,“ segir Gunnar og á við tónleikahald í Hörpu sem er gjarnan á sama tíma og umferðirnar. Hávaðinn er nokkurn veginn orðinn hluti af mótsumhverfinu og kippa skákmenn sem venja komur sínar á Reykjavíkurmótið sér lítið upp við hann: „Mönnum finnst þetta bara svo „júník“ allt saman,“ segir Gunnar í lokin.

Í öðru sæti höfnuðu fjórir skákmenn; Hjörvar Steinn Grétarsson, Max Wanderdam, Mads Andersen og Mishra Abhimanyu.