Orðalag formanna kom starfsmönnum á óvart
Setja bókamerki
Starfsmenn Bankasýslu ríkisins segja orðalag yfirlýsingar stjórnarflokkanna, um annmarka við framkvæmd útboðsins, stjórn og starfsmönnum á óvart. Þrátt fyrir að lengi hafi legið fyrir að til stæði að leggja niður Bankasýsluna.
Þetta kemur fram í yfirlýsingu frá stjórn og starfsfólki Bankasýslunnar.
„Engin formleg gagnrýni hefur borist Bankasýslunni frá ráðherrum ríkisstjórnarinnar á framkvæmd útboðsins þó komið hafi fram að ráðherrar hafi verið ósáttir við að Bankasýsla ríkisins taldi ekki heimilt að birta lista yfir kaupendur í útboðinu. Það mat Bankasýslunnar byggði á álitum fleiri en eins utanaðkomandi lögfræðiráðgjafa stofnunarinnar.“
„Allt ferlið var opinbert“
Í yfirlýsingunni er rakin aðdragandi sölunnar á Íslandsbanka og er þess minnst að í stjórnarsáttmála núverandi ríkisstjórnar var Bankasýslunnar fengið það hlutverk að selja allan eignarhlut ríkisins í Íslandsbanka fyrir árslok 2023 væru markaðsaðstæður hagfelldar.
Greint er frá því að árið 2021 var 35% eignarhlutur í Íslandsbanka seldur í frumútboði sem skilaði ríkissjóði rúmum 55 milljörðum króna.
Í framhaldi var tekin ákvörðun um að selja næsta hlut með svokölluðu tilboðsfyrirkomulagi.
„Í samræmi við lög var óskað eftir umsögn og athugasemdum frá bæði fjárlaganefnd og efnahags- og viðskiptanefnd Alþingis. Þá var einnig óskað eftir formlegri umsögn Seðlabanka Íslands. Allt ferlið var opinbert og nákvæm tímasetning þess er skráð á heimasíðu Bankasýslu ríkisins og í fréttatilkynningum til kauphallar.“
Ekki gert ráð fyrir þátttöku almennra fjárfesta
22,5% hlutur ríkisins í Íslandsbanka var síðan seldur 22. mars með tilboðsfyrirkomulagi og fengust rúmir 52,6 milljarðar króna fyrir hlutinn.
Í yfirlýsingunni segir að sala með þessu fyrirkomulagi felur í sér lokað útboð á hlutum í þegar skráðu félagi til hæfra fjárfesta.
Þetta sé algengasta söluaðferð eftir frumútboð á hlutabréfum í evrópskum fyrirtækjum.
„Í öllum gögnum frá Bankasýslunni kom fram að helsti gallinn við tilboðsfyrirkomulag væri að ekki væri gert ráð fyrir þátttöku almennra fjárfesta í ferlinu.“
Náið samstarf við stjórnvöld
Ríkissjóður á enn 42,5% hlut í Íslandsbanka og er hluturinn metinn á um 100 milljarða.
Þann hlut á eftir að selja og var m.a. gert ráð fyrir þátttöku almennings í næstu skrefum.
Þá segir að framkvæmd við söluna var á grundvelli forsenda sem fram komu í frumvarpi til fjárlaga fyrir árið 2022 og í fullu samræmi við ákvörðun fjármálaráðherra, kynningar Bankasýslunnar fyrir ráðherranefnd ríkistjórnarinnar um efnahagsmál, fjárlaganefnd og efnahags- og viðskiptanefnd Alþingis og Seðlabanka Íslands, eigandastefnu ríkisins fyrir fjármálafyrirtæki, ákvæði laga nr. 88/2009 og laga nr. 155/2012 og viðteknum venjum á hlutabréfamörkuðum.
Stjórnvöld upplýst um öll skref
„Framkvæmd útboðsins fór eins fram og því hafði verið lýst af hálfu stofnunnnar frá upphafi til loka, í nánu samstarfi við stjórnvöld sem voru ítarlega upplýst um öll skref sem stigin voru.
Stjórn og starfsfólk Bankasýslu ríkisins hafa unnið að framkvæmd útboðsins í samræmi við ofangreindar forsendur með fagmennsku og heiðarleika í fyrirrúmi.
Leit stofnunin svo á að framkvæmd útboðsins væri þannig að fullu í samræmi við vilja stjórnvalda enda hafa engin fyrirmæli eða viðbrögð ríkistjórnar borið merki um annað, hvorki í aðdraganda þess né eftir að því var lokið.
Þannig taldi stjórn og starfsfólk Bankasýslunnar sig vinna í fullu umboði fjármálaráðherra og ríkisstjórnar.“
Ekki hlutverk Bankasýslunnar að taka þátt í pólitískri umræðu
Þá segir að stjórn Bankasýslunnar telji þá umræðu sem skapast hefur í kjölfar útboðsins að miklu leyti varða þau pólitísku álitaefni sem sannarlega koma upp vegna sölunnar á Íslandsbanka.
„Ljóst er að það samræmist ekki hlutverki Bankasýslunnar að taka þátt í slíkri umræðu eða taka afstöðu til hennar.“
Stjórn Bankasýslunnar fagnar þó yfirstandandi skoðun á framkvæmd útboðsins af hálfu þar til bærra eftirlitsaðila, „og ekki mun standa á Bankasýslunni við aðstoð og veitingu upplýsinga er það varðar.
Í ljósi fréttaflutnings fjölmiðla í dag telur stjórn og starfsmenn Bankasýslunnar nauðsynlegt að koma ofangreindum sjónarmiðum og upplýsingum á framfæri.“
Bregðast við: Framtíð Grænlands „ræðst í Nuuk“
Kvika spáir í stýrivextina
Ráðamenn þurfa að hafa búið áður á staðnum
Sjö fluttir á sjúkrahús
Áhrif örvandi fíkniefna meginorsök banaslyss
Óásættanlega langur tími