Fæðingartíðni eykst milli ára

Alls fæddust 4.879 lifandi börn á Íslandi á síðasta ári sem er fjölgun frá árinu 2020 þegar 4.512 börn fæddust. Slíkur fjöldi þykir nokkuð hár en einungis þrisvar áður hafa fleiri lifandi fædd börn komið í heiminn á einu ári eða á árunum 1960, 2009 og 2010. 

Í tilkynningu Hagstofunnar segir að 2.576 drengir hafi fæðst á síðasta ári og 2.303 stúlkur. Það jafngildir 1.119 drengjum á móti hverjum 1.000 stúlkum.

Þar kemur jafnframt fram að helsti mælikvarði á frjósemi er fjöldi lifandi fæddra barna á ævi hverrar konu en miðað er við að frjósemi þurfi að vera um 2,1 barn til að viðhalda mannfjölda til lengri tíma litið. Íslendingar virðast þó ekki ná því marki, þrátt fyrir fjölgunina árið 2021 en á síðasta ári var frjósemi íslenskra kvenna 1,82 börn á ævi hverrar konu. Það er þó 0,1 hækkun frá árinu 2020 þegar frjósemi var 1,72.

Fæðingartíðni ungra mæðra lág

Fæðingartíðni meðal ungra mæðra undir tvítugu var nokkuð lág einnig eða 3,3 börn á hverjar 1.000 konur. Til samanburðar var fæðingartíðni mæðra undir tvítugu 84 börn á hverjar 1.000 mæður árin 1961 til 1965 þegar hún fór hæst.

Um ein og hálf öld er liðin frá því að fæðingartíðni mæðra undir tvítugu fór undir fjögur börn á hverjar 1.000 konur, en það gerðist síðast árið 1870.

Aldursbundin fæðingartíðni var hæst í aldurshópnum 20 til 24 ára og 25 til 29 ára frá árinu 1932 til 2018. Breyting varð árið 2019 þegar fæðingartíðnin reyndist hæst innan aldurshópsins 30 til 34 ára og það sama átti við árið eftir. 

Á síðasta ári varð þó aftur viðsnúningur þegar aldursbundin fæðingartíðni varð aftur hæst í aldurshópnum 25 til 29 ára, þá fæddust 121 barn á hverjar 1.000 konur á því aldursbili.

• Blogga um frétt