Kallaður á fund og nærveru hans ekki óskað
Setja bókamerki
Míkhaíl Noskov, sendiherra Rússlands á Íslandi, var boðaður á fund í utanríkisráðuneytinu í dag.
Á fundinum ítrekuðu íslenskir embættismenn fordæmingu stjórnvalda á innrás Rússlands í Úkraínu og gerðu grein fyrir afstöðu Íslands til innrásarinnar, samkvæmt upplýsingum frá utanríkisráðuneytinu.
Þórdís Kolbrún Reykfjörð Gylfadóttir utanríkisráðherra sótti ekki fundinn.
Boðaður fjórum sinnum á fundi
Er þetta í fjórða skipti sem sendiherrann er boðaður til fundar í ráðuneytinu undanfarna mánuði, það er bæði í aðdraganda innrásarinnar 24. febrúar og eftir hana.
Noskov var líka gert grein fyrir því að nærveru hans væri ekki óskað við hátíðahöld 17. júní, en sendiherrum erlendra ríkja er jafnan boðið til þeirra.
Nasistaöfl í skjóli yfirvalda
mbl.is ræddi við Noskov 26. febrúar, tveimur dögum eftir innrásina. Þá sagði hann nasistaöfl þrífast í skjóli yfirvalda í Úkraínu.
„Það er meginástæða þessara hernaðaraðgerða núna, að brjóta á bak herinn í Úkraínu, sem og að losna við nasistana sem eru þar. Aðeins þannig verður hægt að tryggja öryggi íbúa á Donbas-svæðinu, sem og Rússlands,“ sagði sendiherrann.
Ekki sendur úr landi
Þórdís Kolbrún tjáði mbl.is í byrjun aprílmánaðar að verið væri að endurmeta hvort senda ætti sendiherrann úr landi.
„Litháen sendir sendiherra heim en slítur ekki stjórnmálasamstarfi við Rússa. Önnur ríki hafa sent fjölda starfsfólks heim, við erum með fáa starfsmenn og svari Rússland í sömu mynt erum við með óstarfhæft sendiráð í Moskvu,“ sagði hún þá.
„Við horfum á það sem önnur ríki í kringum okkur eru að gera og það er að þokast í eina átt svo við getum ekki útilokað neitt. En við fylgjumst áfram með þróun nágrannalanda og þurfum að vega og meta þetta sjálf frá okkur.“
Ríkisstjórnin ekki beint á leiðinni í jólafrí
„Umferðin greinilega að þyngjast“
Fjallvegir á Vestfjörðum og víða um land á óvissustigi
Fyrsti ríkisstjórnarfundurinn hafinn
„Nánast aftakaveður þegar hryðjurnar ganga yfir“
Leiðindaveður yfir jólahátíðina