Vilja heyra frá fleiri foreldrum og kennurum

Foreldrar nemenda í leikfélagi Flensborgarskóla munu ekki sitja hjá aðgerðalausir vegna óánægju með nýjan skólameistara og vilja þeir funda ásamt fleiri foreldrum nemenda skólans. Þá vilja þeir einnig heyra í þeim kennurum sem talið er að séu ósáttir.

Mbl.is greindi frá því fyrr í dag að fundur foreldra nemenda sem skipa leikfélag skólans, væri í gangi. Tilefni hans var óánægja með skipun nýs skólameistara.

Frétt af mbl.is

Foreldrar nemenda í Flensborg funda

Fundinum er nú lokið en ríflega 20 foreldrar voru viðstaddir auk nokkurra sem tóku þátt í gegnum fjarfundabúnað. Var mætingin talin nokkuð góð en álíka margir voru á fundinum og skipa leikfélagið.

Þá sat fulltrúi skólanefndar Flensborgarskólans m.a. fundinn ásamt nokkrum nemendum sem lýstu upplifun sinni af skólameistaranum fyrir fundargestum.

Skipulögðu hópskróp

Á miðvikudag var Erla Sigríður Ragnarsdóttir skipuð í embætti skólameistara Flensborgarskólans, við litla hrifningu hluta nemenda, en hún hefur starfað sem settur skólameistari frá því árið 2020.

Í yfirlýsingu nemendafélags skólans sem send var á menntamálaráðuneytið sama dag, segir m.a. að nemendur upplifi vanlíðan vegna hennar í skólanum.

Til að mótmæla skipun Erlu Sigríðar skipulögðu nemendur Flensborgar hópskróp í dag. 

Frétt af mbl.is

Nemendur mótmæla nýjum skólameistara

Frétt af mbl.is

Erla Sigríður nýr skólameistari Flensborgarskólans

Fjöldi lýst yfir óánægjulegri reynslu

Frá því að umfjöllun málið hófst hefur fjöldi nemenda skólans sett sig í samband við mbl.is og sagt frá reynslu sinni af skólameistaranum.

Hafa margir lýst yfir mikilli óánægju vegna aðgerðarleysis hennar gagnvart grófum ofbeldis- og eineltismálum sem nemendur segja þrífast innan veggja skólans. Telja nemendur sig ekki geta leitað til hennar og upplifa margir sig ekki örugga í Flensborg.

Segja þeir skólameistara taka afstöðu með gerendum en í stað þess að tekið sé almennilega á alvarlegum málum sem komið hafa upp, þá hefur þolendum m.a. verið boðið að fara í fría sálfræðitíma. 

Ekki hefur náðst í Erlu Sigríði frá því að fréttir af óánægju nemenda fóru fyrst í loftið.

• Blogga um frétt