Ekki til skoðunar að lækka eldsneytisgjöld

Bjarni Benediktsson, fjármála- og efnahagsráðherra, segir ekki vera til skoðunar að lækka tímabundið gjöld á eldsneyti. Bensínverð heldur áfram að hækka hér á landi og hefur aldrei verið dýrara.

„Við myndum ekki vilja grípa til örvandi aðgerða þegar það er spenna í hagkerfinu,“ segir Bjarni í samtali við mbl.is.

Félag íslenskra bifreiðaeigenda hefur skorað á stjórnvöld að lækka gjöld á eldsneyti. „Við höfum sent erindi á stjórnvöld og óskað eftir tímabundinni skattalækkun til að mæta þessu og það höfum við gert áður,“ segir Runólfur Ólafsson, formaður FÍB, í samtali við mbl.is.

Hlutur ríkisins um 50 prósent

Verð á bensíni í dag er 320,9 krónur á bensínlítra hjá N1 og 319,3 krónur hjá Orkunni. Lægsta verðið er hjá Costco þar sem verð á bensínlítra er 281,8 krónur. Hlutur íslenska ríkisins í bensínverði er í dag um 50 prósent.

„Við erum að tala um að hliðra til öðru vörugjaldinu sem er lagt á bensín, serm er föst krónutala, og að lækka olíugjaldið af díselolíunni,“ segir Runólfur. „Vörugjaldið á bensíni er 30,2 krónur sem við erum með sem viðmið varðandi lækkun og svo er auðvitað 24 prósent virðisaukaskattur sem leggst ofan á það þannig þetta gæti verið lækkun um 35 til 40 krónur á lítra.“

Runólfur segir að hingað til hafi stjórnvöld ekki tekið vel í erindið. „Það eru fleiri aðilar sem hafa verið okkur samstíga í þessu eins og til dæmis ASÍ þannig það er kannski núna þegar þetta virðist ekki vera einhver bóla sem stendur yfir í einn til tvo mánuði heldur er þetta því miður eitthvað ástand sem er viðvarandi.“

Runólfur Ólafsson, formaður FÍB. mbl.is/Árni Sæberg

Þyrfti alveg sérstaka réttlætingu

Segir Bjarni að aðgerðir um skattalækkun á eldsneyti séu ekki til skoðunar í augnablikinu.

„Við höfum ekki verið að undirbúa slíkar aðgerðir og ef eitthvað er þá myndi ég hallast að því að í ljósi vaxtahækkanna og versnandi verðbólgu sem orðið hefur frá því að fjármálaáætlun var lögð fram kæmi frekar til álita að við myndum skoða leiðir til þess að auka aðhaldið og leggja þannig meira af mörkum til þess að slá niður verðbólguvæntingar.“

„Af hverju lækkar ekki Seðlabankinn vexti ef heimilin verða fyrir nýjum útgjöldum og ef verkefnið snýst um að gera öllum kleift að komast í gegnum tímabilið? Það er vegna þess að við erum í dag að upplifa of mikla spennu í hagkerfinu og helmingur fyrirtækja fær ekki nægilega margt starfsfólk. Laun hafa hækkað hérna um í kringum átta prósent síðasta árið, við erum ennþá að taka út talsverða kaupmáttaraukningu þrátt fyrir allt og það eru öll merki þess í augnablikinu að það sé of mikil spenna í hagkerfinu og aðgerðir sem myndu verða til þess fallnar að auka ráðstöfunartekjur heimila væru að verka öfugt við það sem Seðlabankinn er að reyna að gera og það þyrfti alveg sérstaka réttlætingu fyrir því.“

Stjórnvöld stýri verðlagningu

„Við erum að sjálfsögðu engir spilarar á heimsmarkaði en stjórnvöld stýra allt að helmingnum á verðlagningunni í gegnum skatta þannig það er hægt að hafa áhrif á afkomu heimila og fyrirtækja með því að breyta eitthvað til í þeim efnum,“ segir Runólfur.

„Við sjáum að það eru til dæmis viðbrögð hjá breskum stjórnvöldum varðandi orkukostnað heimila, þeir eru að reyna að mæta því með auknum álögum á orkufyrirtækin sem aftur á að miðla út sem afslætti til neytenda.“

• Blogga um frétt