Brýn þörf á innfluttu vinnuafli

Kominn er upp skortur á vinnuafli í íslenska hagkerfinu enn einu sinni og ljóst er að enn einu sinni er ekki hægt að manna öll störf nema með innfluttu vinnuafli.

Íslendingum fjölgar ekki nógu mikið til þess að geta fyllt upp í þörfina sem ný störf skapa og erlent vinnuafl verður því sífellt mikilvægara, að því er kemur fram í Hagsjá Landsbankans.

Erlendum ríkisborgurum fjölgað um 160%

Á árunum 2010 til 2013 voru erlendir ríkisborgarar innan við 7% af íbúafjölda hér á landi. Í ár eru þeir um 15%. Frá árinu 2010 hefur íslenskum ríkisborgurum fjölgað um 8,4% á meðan erlendum ríkisborgurum hefur fjölgað um 160%.

Erlendum ríkisborgurum tók að fjölga hér á landi 2012. Á næstu árum fram til 2017 jókst fjölgun aðfluttra umfram brottflutta mikið en eftir þá fjölgun dró aðeins úr 2018 og 2019.

Kórónuveirufaraldurinn og samdráttur hafði greinilega áhrif á flutninga á árinu 2020. Þrátt fyrir það fjölgaði erlendum ríkisborgurum það ár. Fjölgunin jókst aftur árið 2021 og nú á fyrsta ársfjórðungi 2022 var fjölgunin álíka og á árinu 2019.

Á árinu 2005 voru 20 til 59 ára innflytjendur 7% af fjölda starfandi á vinnumarkaði hér á landi. Núna á fyrsta ársfjórðungi 2022 var hlutallið 22,3% og hefur aldrei verið hærra. Hlutfall innflytjenda fór undir 20% á árinu 2021 en hefur nú náð fyrri stöðu.

Þörf á erlendu háskólamenntuðu fólki

Samtök atvinnulífsins telja að flytja þurfi inn 12 þúsund starfsmenn á næstu fjórum árum. Störfum muni fjölga um 15 þúsund á árunum 2022 til 2025 en innlendu fólki á starfsaldri fjölgi einungis um þrjú þúsund. Gangi þetta eftir, sem allt bendir til, yrði hlutfall innflytjenda af starfandi fólki komið yfir 27% á árinu 2025, að því er segir í Hagsjánni. 

Fram til þessa hefur starfsfólk úr röðum innflytjenda einkum verið ófaglært. Bent hefur verið á að á næstu árum verði ekki síður skortur á háskólamenntuðu fólki. Í því sambandi þurfi laða erlent háskólamenntað starfsfólk til landsins.

• Blogga um frétt