„Ekkert vesen“ á stuðningsmönnum þrátt fyrir bjór

Eins og greint hefur verið frá þá fór bjórsala fram í fyrsta skipti á Laugardalsvelli í gær en það hafði engin áhrif á hegðun stuðningsmanna á leiknum í gær að sögn lögreglu. 

Lögreglan þurfti ekki að grípa til neinna aðgerða í gærkvöldi eftir leikinn og var enginn aukinn viðbúnaður lögreglu í kringum Laugardalsvöll. Þetta staðfestir Kristján Helgi Þráinsson, aðstoðaryfirlögregluþjónn aðgerðar- og skipulagsdeildar hjá lögreglunni, í samtali við mbl.is í dag.

Frétt af mbl.is

Miðasala tók kipp eftir fregnir um bjórsölu

Aðspurður segir Kristján allt hafa farið vel fram. „Allt hefðbundið hjá okkur, í rauninni ekkert vesen,“ segir Kristján og bætir við að hann hafi ósköp lítið að segja um gærkvöldið.

Spurður hvort að viðbúnaður lögreglu hafi verið aukinn vegna bjórsölu á leiknum svarar Kristján því neitandi og nefnir að um hafi verið að ræða lágmarks löggæslu á leiknum. Bætir hann við að stuðningsmenn hafi verið líflegir en fyrst og fremst prúðir.

Sömu sögu að segja af Albönunum

Spurður hvort að sömu sögu væri hægt að segja af hegðun stuðningsmanna Albaníu á leiknum segir Kristján að þeir hafi sömuleiðis verið mjög fínir og flottir. „Ég sá að það var einn sem hoppaði þarna inn á hlaupabrautina en hann baðst strax afsökunar og sagðist hafa gleymt sér í fagnaðarlátunum og hoppaði strax til baka,“ segir Kristján.

Bendir Kristján á að allir eigi það til að missa sig í fagnaðarlátum og að Albanar hafi verið skemmtilegir og háværir eins og á að vera á fótboltaleikjum.

Hér má sjá mynd af atvikinu í gær þegar að einn stuðningsmanna Albaníu hoppaði út á hlaupabrautina á Laugardalsvellinum. Eins og sjá má þurfti ekki mikil viðbrögð frá gæslu á svæðinu og var hann fljótur að biðjast fyrirgefningar. Kristinn Magnússon

Hér sést einn stuðningsmanna með tvo bjóra en sumir vanari menn vísa til þessa sem tvíhleypu. Kristinn Magnússon

• Blogga um frétt