SS boðar methækkun á afurðaverði til bænda

Sauðfjárbændur munu fá 23 prósentum hærra verð fyrir afurðir sínar, frá Sláturfélagi Suðurlands, SS, í haust. Um er að ræða óvenjumikla hækkun, að sögn Steinþórs Skúlasonar, forstjóra SS. „Við erum að koma til móts við gríðarlega hækkun rekstrarvöru hjá bændum. Sauðfjárbændum sérstaklega þar sem áburður vegur hlutfallslega þyngra hjá þeim en öðrum.“

Frétt af mbl.is

Leggja til að styrkja landbúnað um 2,5 milljarða

Hver afurðastöð gefur út verðskrá á hverju ári þar sem fram kemur það verð sem hún er tilbúin að greiða fyrir kjötið. Steinþór rekur ekki minni til þess að nokkurn tíma hafi afurðaverð hjá SS hækkað jafnmikið og fyrirhugað er að það geri í haust.

Verulegur hluti þessara hækkana mun smitast út í verðlagið, enda lítið svigrúm til aukinnar hagræðingar innan afurðastöðva, að mati Steinþórs. Þannig mun íslenskt lambakjöt hækka í verði, en þó ekki jafn mikið og afurðaverðið. 

Lesa má nánar um málið í Morgunblaðinu í dag.