Reyndi mjög á viðbragðsaðila

Mikið reyndi á viðbragðsaðila eftir að banaslys varð vestan Kúðafljóts í síðustu viku þegar erlendur ferðamaður á sjötugsaldri lést og eiginkona hans slasaðist alvarlega.

Frétt af mbl.is

Banaslys austur af Vík

Sjúkrabíll flutti konuna til móts við þyrlu Landhelgisgæslunnar, sem lenti austan við Pétursey og flaug með konuna á Landspítalann.

Fram kemur á facebooksíðu lögreglunnar á Suðurlandi, þar sem meðfylgjandi ljósmynd frá einum viðbragðsaðilanna var birt, að samstarf viðbragðsaðila sé lykilatriði til árangurs við björgunaraðgerðir.

Lögreglan stöðvaði umferðina

Oddur Árnason, yfirlögregluþjónn hjá lögreglunni á Suðurlandi, lýsir aðgerðunum þannig að lögreglan ók á undan sjúkrabílnum til móts við þyrluna og stöðvaði síðan umferðina til að hún gæti lent og sjúkrabíllinn athafnað sig við að færa konuna yfir í þyrluna.

Frétt af mbl.is

Alvarlegt umferðarslys vestan Kúðafljóts

Á ljósmyndinni má sjá þyrlu Gæslunnar og sjúkrabíl frá Heilbrigðistofnun Suðurlands, ásamt lögreglubílum á vettvangi. „Þetta eru bara þrír af fjölmörgum viðbragðsaðilum sem við erum að vinna með á hverjum tíma,“ segir Oddur og nefnir að slökkviliðin frá Vík í Mýrdal og Kirkjubæjarklaustri hafi einnig verið á meðal viðbragðsaðila í umræddu slysi.

Aðspurður segist hann ekki hafa upplýsingar um líðan konunnar. Hann getur heldur ekki greint frá þjóðerni fólksins. 

• Blogga um frétt