Hoppaði ekki úr sófanum og beint á hjólið

„Ég ákvað einfaldlega að skrá mig í þetta Íslandsmót,“ segir Þorbergur Ingi Jónsson, einn fremsti lang­hlaup­ari lands­ins, í samtali við mbl.is. Hann hafnaði í þriðja sæti í Íslandsmeistaramótinu í götuhjólreiðum sem fór fram á Akureyri um liðna helgi.

Þorbergur, sem er þekktari fyrir afrek sín í lengri hlaupum, hafði tekið þátt í einu hjólamóti á Mývatni fyrir um mánuði síðan áður en kom að Íslandsmótinu.

Frétt af mbl.is

Ingvar og Hafdís fögnuðu sigri

Þorbergur fór í aðgerð á hæl í lok janúar og hefur lítið sem ekkert getað hlaupið síðan. Hann hefur hins vegar hjólað þennan fyrri hluta ársins.

„Ég hjóla bara og svo finnst mér gaman að keppa og hafa eitthvert markmið. Í stað þess að bíða eftir því að verða nógu góður til að hlaupa þá hjóla ég bara og það er fínt,“ segir Þorbergur.

Þorbergur er þekktari fyrir afrek sín í hlaupum. Fyrir þremur árum kom hann fyrstur í mark í Laugavegshaupinu eftir að hafa hlaupið brautina fram og til baka. Hlaupaleiðin er 55 kíló­metr­ar og sam­tals hljóp hann því 110 kíló­metra.

Hann segir að það sé ekki eins og hann hafi hoppað úr sófanum og hjólað af stað:

„Ég er venjulega að keppa í greinum sem eru þrír til 24 tímar. Ég keypti mér alvöru racer í lok apríl og byrjaði að hjóla mikið í maí og júní. Ég finn að ég er að skólast vel til.“

Kom að einhverju leyti á óvart

Þorbergur vissi þó ekki við hverju ætti að búast á Íslandsmótinu og segir keppinauta hans flesta mjög sterka hjólreiðamenn. „Þetta kom því að einhverju leyti á óvart en samt var ég alveg búinn að sjá mig fyrir mér á verðlaunapalli. Ég er þannig gíraður einhvern veginn.“

Þorbergur vonast til að geta hlaupið meira og meira næstu vikur og mánuði til að ná góðum undirbúningi fyrir heimsmeistaramót utanvegahlaupara sem fram fer í Tælandi í byrjun nóvember. Þorbergur mun þar, ásamt níu öðrum Íslendingum, etja kappi við fremstu utanvegahlaupara í heimi í 80 kílómetra hlaupi.

• Blogga um frétt