Segir Framsókn hafa svikið kosningaloforð í dag
Setja bókamerki
Helga Kristín Gunnarsdóttir, stjórnandi facebook-hóps íbúasamtakanna Vina Vatnsendahvarfs, segir Framsókn hafa svikið kosningaloforð sitt þegar nýtt deiliskipulag var samþykkt í umhverfis- og skipulagsráði Reykjavíkur í dag.
„Á fundi Náttúruvina Reykjavíkur fyrir kosningar þá var Þorvaldur Daníelsson varaborgarfulltrúi staðfastur á því að Framsókn myndi ekki samþykkja Arnarnesveg í núverandi mynd,“ skrifar Helga í færslu í áðurnefndum facebook-hóp.
„Hann sagði að Framsókn myndi kalla eftir því að nýtt umhverfismat yrði gert fyrir þessa framkvæmd, enda hvorki umhverfislega né siðferðislega verjandi að byggja slíka framkvæmd á tveggja áratuga gömlu umhverfismati.“
Ítrekað reynt að ná tali af Einari
Þá segir hún Náttúruvini Reykjavíkur og Vini Vatnsendahvarfs ítrekað hafa reynt að ná tali af Einari Þorsteinssyni en hann hafi hunsað alla þeirra pósta.
Helga bætir við að hún hafi nýlega náð tali af Þorvaldi og að hann hafi sagst ekki hafa áttað sig á því að málið væri svona langt komið, en hann myndi skoða þetta betur og hafa síðan samband.
Líklega síðasta sumarið til að njóta náttúrunnar
„Við heyrðum ekki aftur frá honum og Framsókn kaus með nýju deiliskipulagi í morgun án þess að fara fram á nýtt umhverfismat,“ skrifar Helga.
Hún bendir á að Kolbrún Baldursdóttir, oddviti flokks fólksins í Reykjavík, hafi ítrekað reynt að fá málinu frestað og kallað eftir nýju umhverfismati sem var hafnað.
Þá segir Helga að samtökin muni kæra deiliskipulagið en hún telur ólíklegt að kæran verði tekin fyrir efnislega áður en framkvæmdir hefjast.
Hún hvetur þá fólk til að njóta náttúrunnar og útsýnisins á hæðinni áður en framkvæmdir við 3. kafla Arnarnesvegar hefjast. Þetta sé líklega síðasta sumarið til þess.
Sums staðar á samfélagsmiðlum hefur að undanförnu mátt sjá fólk harma áform um lagningu vegarins.
Aðstæður breyst verulega
Íbúar í nágrenni fyrirhugaðs vegar hafa bent á að aðstæður hafi breyst svo mikið á þeim fjörutíu árum sem vegurinn hefur verið í umræðunni, og frá því umhverfisáhrifin voru metin að nauðsynlegt sé að gera nýtt umhverfismat.
Reykjavíkurborg hefur ekki tekið undir þessi sjónarmið.
Óvissustigi á Vestfjörðum aflýst
Greiningarmiðstöð hluti af 13 landamæraaðgerðum
110 milljónir í stöðu prófessors
Par flutt á bráðamóttöku eftir árás
Unnu eftir kröfugerð sem lögð var fram í upphafi
Frestar skerðingum fyrir norðan og austan
