Margir á Suðurland

Búast má við að fjöldi ferðafólks verði á Suðurlandi á næstu dögum, samanber að fyrsta helgi júlí er jafnan vinsæl til ferðalaga. Reiknað er með að margir muni verða á tjaldsvæðum og dveljast til dæmis á Þingvöllum, Reykholti í Biskupstungum, Flúðum, Brautarholti á Skeiðum, Laugalandi í Holtum og víðar. Þá dveljast þúsundir í sumarhúsum, til dæmis í uppsveitum Árnessýslu. Á þessum slóðum og víðar verður lögreglan alla helgina, til eftirlits og inngripa ef við á.

„Sjálfsagt verður talsverður erill hér um helgina,“ segir Oddur Árnason yfirlögregluþjónn á Suðurlandi í samtali við Morgunblaðið. Hann segir að ungt fólk sé nú að fá sína fyrstu útborgun í sumarstarfi og þá fari margir í útilegu og skemmtun. Vonandi gangi þó allt stórslysalaut. Þá má búast við að fjörugt gæti orðið um aðra helgi en þá verða á Suðurlandi tónlistarhátíðin Kótelettan á Selfossi og Landsmót hestamanna á Gaddstaðaflötum við Hellu.

Lengri umfjöllun um málið má finna í Morgunblaðinu í dag, föstudag.