Rannsókn á mansalsmáli ljúki með haustinu

Reiknað er með því að rann­sókn á máli manns sem er grunaður um man­sal á ung­um dreng, ljúki með haust­inu.

Þetta seg­ir Úlfar Lúðvíks­son, lög­reglu­stjóri á Suður­nesj­um, í sam­tali við mbl.is. Hann bæt­ir við að dreng­ur­inn sé í um­sjón á góðum stað.

Frétt af mbl.is

„Snúið“ man­sals­mál í fullri rann­sókn

Maður­inn sæt­ir ekki gæslu­v­arðhaldi, held­ur til­kynn­inga­skyldu og hef­ur óskað eft­ir alþjóðlegri vernd. 

Grun­ur leik­ur á um að brotið hafi verið gegn drengn­um kyn­ferðis­lega og hann beitt­ur van­v­irðandi meðferð. 

mbl.is/​Eggert Jó­hann­es­son

Kvaðst hafa flakkað um Evr­ópu

Þann 28. apríl hafði lög­regla af­skipti af mann­in­um sem hafði dreng­inn í för með sér. Þeir komu sam­an með flugi frá Kaup­manna­höfn og voru án ferðaskil­ríkja en ­maður­inn fram­vísaði af­rit­um af ætluðum vega­bréf­um. 

Hann kvaðst hafa verið á flakki um Evr­ópu í þrjú ár ásamt barn­inu og skilið það um tíma eft­ir hjá skyld­menn­um.

Þá fram­vísaði hann gögn­um til stuðnings heim­ild sinni til að ferðast með barnið, en lög­regla taldi skjalið ótraust og gátu sér­fræðing­ar ekki full­yrt um áreiðan­leika inni­halds­ins, að því er fram kom í dómi Héraðsdóms Suður­nesja, sem var staðfest­ur af Lands­rétti. 

• Blogga um frétt