Innlent | mbl | 12.7.2022 | 15:30

Fjórar bílveltur fyrir austan í júní

Lögreglan á Austurlandi hafði í nógu að snúast í júní. mbl.is/Eggert Jóhannesson

Alls hafa 20 umferðarslys verið skráð á Austurlandi fyrstu sex mánuði ársins. Síðustu þrjú árin voru þau að meðaltali 12 talsins á ári og hefur þeim því fjölgað umtalsvert á þessu ári.

Ekkert banaslys varð á þessum árum en á þessu ári hefur eitt orðið, eða í Djúpavogi 21. júní.

Rann á öfugan vegarhelming

Sex umferðarslys voru tilkynnt til lögreglunnar á Austurlandi í júní og þurftu níu einstaklingar að leita aðstoðar heilbrigðisþjónustu vegna þeirra, að því er kemur fram í tilkynningu frá lögreglunni.

Þar eru umferðarslysin í júní rakin. Það fyrsta varð laust eftir miðnætti 1. júní. Ökumaður á leið til Egilsstaða um Fagradal missti stjórn á bifreið sinni við Grænafell, rann yfir á öfugan vegarhelming og þar í veg fyrir bifreið er kom úr gagnstæðri átt. Þrír slösuðust í árekstrinum, ökumenn beggja bíla og farþegi í öðrum þeirra. Allir virðast hafa sloppið með minniháttar meiðsl. Rannsókn stendur yfir en grunur leikur á að ökumaður á leið norður hafi ekið yfir leyfilegum hámarkshraða.

Degi síðar lenti bifreið út af Norðfjarðarvegi við Skorrastaði og valt. Tveir voru í bifreiðinni en hvorugur slasaðist alvarlega. Grunur leikur á að ökumaður hafi dottað við akstur.

mbl.is/Hari

Ryk þyrlaðist upp

Miðvikudaginn 8. júni varð önnur bílvelta, á Axarvegi við Þrívörðuhálsa. Einn var í bílnum og var hann fluttur á heilsugæslu á Djúpavogi. Hann er ekki talinn alvarlega slasaður. Ökumaðurinn mun hafa misst útsýni úr bifreið sinni sökum ryks sem þyrlast hafði upp frá bifreið á undan og það orsakað óhappið.

Kind í veg fyrir bifreið

Þriðjudaginn 14. júní varð þriðja bílveltan eftir að kind hljóp í veg fyrir bifreið á leið um Hróarstunguveg við Kirkjubæ á Héraði með þeim afleiðingum að ökumaður missti stjórn á henni og velti utan vegar. Hann var fluttur með sjúkrabifreið á sjúkrahúsið í Neskaupstað
talsvert lerkaður.

Daginn eftir féll eldri maður á reiðhjóli á Egilsstöðum og slasaðist nokkuð og var jafnvel talinn fótbrotinn.

mbl.is/Kristinn Magnússon

Fékk fjórhjól yfir sig

Sunnudaginn 19. júni var ökumaður á ferð á fjórhjóli á grófum malarslóða ofan Egilsstaða er hann missti stjórn á hjólinu og velti eftir að hafa lent á grjóti. Hann fékk hjólið yfir sig og slasaðist nokkuð þrátt fyrir að vera í góðum hlífðarbúnaði.

Enn ein veltan varð 21. júní þegar flutningabifreið lenti út af Upphéraðsvegi við Ormarstaðaá í Fljótsdalshreppi. Ökumaður slasaðist talsvert og var fluttur til aðhlynningar á HSA á Egilsstöðum. Hann mun hafa ekið of langt út á öxl vegarins með þessum afleiðingum.

Sama dag, um hádegisbil þriðjudaginn 21. júní, varð áðurnefnt banaslys á Djúpavogi. Erlendur ferðamaður lenti þar fyrir lyftara. Það mál er í rannsókn.