Vatnsborð lághitasvæða nálgast hæstu hæðir

Staðan á vatnsborði lághitasvæða höfuðborgarsvæðisins nálgast hæstu hæðir samanborið við síðustu ár, þar sem öll hitaveita er í sumar rekin á vatni frá Hellisheiðar- og Nesjavallavirkjun, en þannig geta Veitur hvílt borholurnar og safnað heitu vatni fyrir veturinn.

Eru þetta jákvæðar fréttir í ljósi umræðu um skort á heitu vatni undanfarið, að því er segir í tilkynningu frá Orkuveitu Reykjavíkur.

Borhola á Laugarnessvæðinu í Reykjavík sem hefur verið í hvíld frá því í júní. Vatnsborðsstaðan er afar jákvæð um þessar mundir. Ljósmynd/Aðsend

Hvíla borholurnar

Vegna aukinnar notkunar þurfi Veitur að leita leiða til að framleiða meira af heitu vatni, með sívaxandi byggð á höfuðborgarsvæðinu í huga, og er borholuhvíld einn liður í því.

Verið er að hvíla borholurnar í lengri tíma en áður hefur verið gert. Stefnt er að því að hvíla þær frá júní og fram í september. Eykur þetta sjálfbærni jarðhitavinnslunnar og lengir líftíma lághitasvæðanna.

• Blogga um frétt