Lögregla kölluð út í farþegaþotu Wizz Air
Setja bókamerki
Átta lögreglumenn lögreglunnar á Suðurnesjum leiddu hóp farþega frá borði farþegaþotu Wizz Air á Keflavíkurflugvelli seint í gærkvöldi.
Þetta staðfestir Úlfar Lúðvíksson, lögreglustjóri á Suðurnesjum, í samtali við mbl.is.
Flugvélin, sem var á leið frá Varsjá í Póllandi, lenti rétt fyrir miðnætti í gær.
Hópurinn, sem var fjölmennur, hafði verið sýnilega ölvaður frá upphafi ferðarinnar, með töluverðar óspektir, og margir í hópnum ítrekað neitað að halda kyrru fyrir í sætum sínum á meðan fluginu stóð, samkvæmt heimildum mbl.is.
Hrópuðu í kallkerfið
Í samtali við mbl.is segir sjónarvottur að flugfreyjurnar um borð hafi augljóslega verið undir miklu álagi. Gripu þær nokkrum sinnum til þess ráðs að hreinlega hrópa í kallkerfi vélarinnar til að koma fyrirmælum til hópsins til skila.
Þá mun þess einnig hafa orðið vart að menn úr hópnum höfðu reykt inni á salernum vélarinnar.
Samkvæmt heimildum mbl.is var um að ræða pólska stuðningsmenn knattspyrnuliðs.
KR mætir pólska liðinu Pogoń frá Szczecin í Vesturbænum í kvöld, í fyrstu umferð Sambandsdeildarinnar.
Eins og mbl.is greindi frá fyrr í dag ollu stuðningsmenn Pogoń usla á EM-torginu í miðbæ Reykjavíkur í dag þar sem fólk fylgdist með leik íslenska kvennalandsliðsins á móti því ítalska.
Vegfarendur sem mbl.is ræddi við töldu í fyrstu að um mótmæli væri að ræða en af treyjunum að dæma mátti sjá að þarna væru öflugir stuðningsmenn á ferð.
Hvað er Trump búinn að gera?
Íbúar komnir heim á ný
„Sársauki okkar er nístandi“
Gjöldum dembt á í blindni
Stefnt að afgreiðslu Íslandsbankasölu á vorþingi
Náðun stuðningsmanna Trumps vekur ólík viðbrögð
Þykir gott að flóðin féllu