Mikilvægast að kynnast hjartslætti skólans

Kolfinna Jóhannesdóttir tekur við sem skólameistari Kvennaskólans næsta haustmisseri, en hún segir mikilvægt að stefnur og umbætur á skólastarfi komi innanfrá. 

Frétt af mbl.is

Kolfinna nýr skólameistari Kvennaskólans

Umbætur eiga að styrkja farsæld nemenda

„Til að byrja með er mikilvægt að kynnast hjartslætti skólans, en það eru auðvitað starfsmenn, kennarar og nemendurnir," segir Kolfinna í samtali við mbl.is. Hún telur að gott skólaumhverfi einkennist af umbætum í samráði við nemendur og kennara. 

„Ég hef mína sýn á skólanum, en hún er mjög lík Kvennaskólanum og ein af ástæðum þess að ég sótti um.“ Kolfinna segir það mikilvægt að halda í hefðir skólans samhliða þess að innleiða nýjar stefnur í skólastarfið. 

Þaulreynd í stjórn og skólastarfi

Kolfinna hefur starfað í þó nokkrum stjórnarstöðum og komið að í skólaumhverfi áður þar sem hún var skólameistari Mennta­skóla Borg­ar­fjarðar 2011–2014. Hún telur almennt að fyrri reynsla muni nýtast henni vel til þróunarstarfs í skólanum. 

Einnig hefur hún komið að fjölbreyttum verkefnum hjá menntamálastofnun. „Ég held að sú reynsla sem ég fékk í þessum verkefnum muni nýtast mér í þeirri áherslu sem í dag ríkir, en það hefur orðið mikil aukning á samþættingu þjónustukerfa og farsæld nemenda.“  

Doktorsnám hefur veitt mikla innsýn

Kolfinna er komin langt með doktorsnám þar sem viðfangsefnið er framkvæmd ríkjandi stefnu á framhaldsskólastigi og telur hún námið hafa henni veitt mikla innsýn í alþjóðlega strauma og stefnur, en að hennar sögn mun það hjálpa við ígrundun á stefnu skólans. 

„Það er eðlilegt að með nýju fólki komi nýjar áherslu, en fyrst og fremst hlakka ég til að kynnast bæði starfsfólki og nemendum skólans."

• Blogga um frétt