Gæti náð hámarki í ágúst

Verðbólga hefur hækkað meira en gert var ráð fyrir og mælist hún nú 9,9%. Una Jónsdóttir, forstöðumaður hagfræðideildar Landsbankans, segir skammtímaspár benda til þess að verðbólgan nái hámarki í ágústmánuði í 10,3%. Það gæti þó breyst áður en formleg spá er gefin út.

„Þessi verðbólga er keyrð áfram af miklum hækkunum á húsnæðisverði. Við erum ekki farin að sjá rólegri takt eins og við vorum búin að gera ráð fyrir. Það virðist einhver bið eftir því,“ segir Una í samtali við mbl.is.

Frétt af mbl.is

Verðbólgan komin í 9,9%

Villa Hagstofunnar spilaði inn í

Hún segir að flugfargjöld hafi einnig hækkað talsvert milli mánaða, mun meira en gert var ráð fyrir, sem skýrist meðal annars af villu Hagstofunnar í síðasta mánuði, þar sem hækkunin var í raun meiri í júnímánuði en upprunalega birtist í gögnum Hagstofunnar.

„Þess vegna gerðum við ekki ráð fyrir svona mikilli hækkun núna en hún er mjög mikil.“ Eftirspurn eftir flugi sé mikil og hnökrar hafi verið í rekstri.

„Þannig að það eru truflanir á framboðshliðinni á meðan að eftirspurn er mjög mikil. Það skýrir það að verðið fari svona hátt upp.“

Flugfargjöld hafa farið upp, bæði vegna eftirspurnar en líka vegna hnökrum í flugrekstri. mbl.is/Kristinn Magnússon

Fleiri gögn eftir að berast

Spurð hvenær hún búist við að verðbólgan nái hámarki segir Una að einhver bið verði á því. „Verðbólgan er komin hærra en við áttum von á. Við gerum ráð fyrir að hún nái hámarki í ágúst, þá eitthvað yfir 10% en hjaðni síðan.“ Hún muni þó hjaðna frekar hægt.

„Eins og skammtímaspáin lítur út núna, þá spáum við því að verðbólgan nái hámarki í 10,3% í ágúst. Þó eiga fleiri gögn eftir að berast áður en við gefum út formlega spá í ágúst. Þetta er bara staðan eins og hún lítur út akkúrat núna.“

Fasteignamarkaðurinn spili þar lykilhlutverk. „Við tökum í raun alltaf stöðuna þegar við fáum ný gögn um horfur þar.

Enn sem komið er gefi þau gögn ekki endilega tilefni til bjartsýni.

„Þessi verðbólga er keyrð áfram á miklum hækkunum á húsnæðisverði. Við erum ekki farin að sjá rólegri takt eins og við vorum búin að gera ráð fyrir.“ Morgunblaðið/Sigurður Bogi

Eru engin gögn sem benda til hins gagnstæða?

„Í rauninni ekki, ekki verðmælingar allavega. Við höfum aftur á móti heyrt af því að fasteignamarkaðurinn sé farinn að róast – það er að segja lengri sölutími á íbúðum og færri íbúðir sem eru að seljast.

Það ætti að leiða til aðeins hófstilltari þróunar en það hefur ekki komið fram í verðkönnunum enn sem komið er."

• Blogga um frétt