Icelandair aftur á flugi

Bogi Nils Bogason, forstjóri Icelandair, segir hagnað á öðrum ársfjórðungi í ár mikilvægan lið í að styrkja fjárhag félagsins og efnahagsreikning þess. Það standi nú sterkari fótum fjárhagslega en mörg flugfélög. Meðal annars sé lausafjárstaðan mjög sterk og e.t.v. sterkari en nokkru sinni í sögu Icelandair.

Flugfélög urðu fyrir miklu höggi í kórónuveirufaraldrinum en hafa mörg hver náð vopnum sínum eftir að ferðalög færðust í fyrra horf.

Spurður, hvort batinn í rekstri Icelandair sé umfram spár, segir Bogi Nils að horfa þurfi til margra þátta. Þar með talið mikilla hækkana á eldsneytisverði en þær hafi haft mikil áhrif á rekstur flugfélaga í ár. „Ef ekki væri fyrir hækkandi eldsneytisverð, og annað væri óbreytt, þá værum við auðvitað í enn betri málum.“

Hafa verið rekin með tapi

„Önnur flugfélög hafa þurft að fella niður mun fleiri flugferðir en við og við höfum séð flugfélög rekin með tapi á öðrum fjórðungi. Þannig að almennt erum við í góðri stöðu miðað við mörg önnur flugfélög. Það er okkar mat,“ segir Bogi Nils.

Tilkoma Boeing MAX-farþegaþotna í flotann hafi sparað félaginu tæpa þrjá milljarða í eldsneytiskostnaði á öðrum ársfjórðungi. 6