Aftur krotað á regnbogafánann

Aftur hafa hatursskilaboð dúkkað upp á tröppunum fyrir framan Grafarvogskirkju, sem skreyttar eru með litum regnbogafánans.

Að þessu sinni var tilvísun í 3. Mósebók í Biblíunni þar sem segir: „Leggist karlmaður með karlmanni eins og lagst er með konu fremja þeir báðir viðurstyggilegt athæfi. Þeir skulu báðir líflátnir. Blóðsök þeirra skal koma yfir þá.“

Frétt af mbl.is

Antikristur yfir regnbogann hjá Grafarvogskirkju

Segir frá þessu í færslu á Facebook-síðu kirkjunnar þar sem einnig er tekið fram að í sama kafla séu ýmis ákvæði um að lífláta skuli fólk fyrir aðrar sakir, til dæmis að bölva föður sínum eða móður.

Kjósa frekar að fylgja boðskap Jesú

Fyrr í vikunni hafði óprúttinn aðili ritað „Antichrist!“ á tröppurnar en sama dag var málað yfir hatursskilaboðin.

„Við í Grafarvogskirkju kjósum frekar að fylgja boðskap Jesú Krists, sem sagði okkur að elska hvert annað. Við trúum því að hver einasta manneskja sé elskuð sköpun Guðs sem hefur leyfi til að lifa því lífi sem henni/háni/honum er áskapað,“ segir í færslu Grafarvogskirkju.

• 1 blogg um fréttina

Bloggað um fréttina

• Helga Dögg Sverrisdóttir: Fjölgun útlendinga, fleiri trúarbrögð