Sigurður Hannesson, framkvæmdastjóri Samtaka iðnaðarins, segir jákvætt að samkomulag hafi náðst milli Rússlands og Úkraínu um að hefja flutning á korni á ný. Það sé þó áhyggjuefni ef samningurinn nær ekki fram að ganga í ljósi árásar Rússa á Ódessa-höfn degi síðar, þar sem korn er unnið til flutnings.
Þetta kemur fram í Morgunblaðinu í dag, mánudag.
„Það er auðvitað áhyggjuefni ef ekki verður hægt að flytja út þessar vörur, þá er hætt við því að þessi óstöðugleiki á markaðnum dragist á langinn, verð verði hærra lengur og það taki lengri tíma fyrir markaðinn að jafna sig. Það eru þó vonir um að það sé að komast á jafnvægi. Við höfum séð hvernig hrávöruverð hefur lækkað og markaðirnir eru að ná jafnvægi, en verðlagsáhrifin eru að koma fram núna og verða jafnvel eitthvað meiri,“ segir Sigurður.
„Áhrifanna gætir út um allan heim og við sjáum það mjög glöggt í verðbólgumælingum. Þetta kemur við sögu út um allt, neytendur og atvinnurekendur finna fyrir þessu og framleiðslufyrirtæki og fyrirtæki í byggingariðnaði verða mjög vör við þessar hækkanir. Þetta hefur mjög mikil áhrif á þeirra rekstur,“ segir Sigurður og bendir á að í sumum tilvikum hafi orðið erfiðara að fá aðföng.
Nánar er fjallað um málið í Morgunblaðinu í dag.