Allir farþegarnir enn á landinu

Lögreglan hefur engan grunaðan um að bera ábyrgð á sprengjuhótuninni sem fannst í gær í Airbus-flugvél sem var á leið frá Frankfurt í Þýskalandi til Seattle í Bandaríkjunum. Allir 266 farþegar vélarinnar eru enn á landinu en enginn þeirra er í haldi lögreglu og verður þeim öllum gert kleift að ferðast til Seattle í flugi sem mun yfirgefa landið klukkan 12 í dag. Reiknað er með að flestir nýti sér þann kost þó sumir treysti sér mögulega ekki um borð í flugvél strax aftur.

Þetta segir Úlfar Lúðvíksson lögreglustjóri á Suðurnesjum í samtali við mbl.is.

Frétt af mbl.is

Flugvél snúið við vegna sprengjuhótunar

Frétt af mbl.is

Engin sprengja hefur fundist

Úlfar segir farþegana hafa brugðist ágætlega við og að þeir hafi verið samvinnufúsir og sýnt þessu skilning. Síðustu farþegar vélarinnar yfirgáfu flugstöðina í kringum miðnætti í gær. Þeim var síðan öllum útvegað gistipláss þar sem þeir dvöldu í nótt.

Sprengjuhótunin var skrifuð á spegil í flugvélinni. „Það er sprengja, stóð þarna á ensku,“ tekur Úlfar fram en vildi ekki tjá sig með hverju hótunin var skrifuð. 

Öllum farþegum boðin áfallahjálp

Að sögn Úlfars gengu aðgerðir lögreglu mjög vel í gær og lauk vinnu þeirra á þriðja tímanum í nótt þegar þau höfðu lokið við að leita í öllum farangri farþega og í vélinni sjálfri. „Þetta er tímafrekt,“ segir Úlfar. 

Hann bætir við að allt hafi verið með kyrrum kjörum á flugvellinum og að farþegar og aðrir hafi haldið ró sinni. „Ég veit ekki til þess að neitt ástand hafi skapast.“

„Þetta er erfið staða til að lenda í fyrir flugfarþega og það er allt gert til að þessu fólki líði bærilega,“ segir Úlfar en öllum farþegum var boðið upp á áfallahjálp frá Rauða krossinum á flugstöðinni sem að þó nokkrir nýttu. 

Úlfar segir málið nú vera til rannsóknar hjá lögreglunni á Suðurnesjum. Spurður hvort að þeir hafi haldlagt eitthvað eftir leit í vélinni segir Úlfar að lögreglan hafi safnað saman gögnum sem voru síðan send til frekari rannsóknar. 

• Blogga um frétt