Innlent | mbl | 26.7.2022 | 16:54 | Uppfært 17:40

Tripical óheimilt að hækka verð útskriftarferðar

315 útskriftarnemum barst 15.000 króna rukkun frá ferðaskrifstofunni Tripical innan við mánuð fyrir brottför. AFP

Niðurstaða Neytendastofu er sú að ferðaskrifstofunni Tripical hafi verið óheimilt að hækka verð á pakkaferð útskriftarhópa til Krítar, tuttugu dögum fyrir brottför. Félagið rukkaði hvern þátttakenda aukalega um 15.000 kr. vegna töluverðra hækkana á eldsneytisverði.

Þetta er niðurstaða Neytendastofu.

Nemendur sendu kvartanir til Neytendastofu

Fjölmargir úr ferðahópnum sendu kvartanir á Neytendastofu vegna verðhækkananna. Haft var samband við þátttakendur í gegnum tölvupóst og tilkynnt verðhækkunina, en engar frekari útskýringar bárust ferðamönnunum.

Að sögn Tripical var ferðin kynnt nemendum haustið 2021 og hún bókuð í janúar á þessu ári. Alls hafi 315 nemendur skráð sig og kostaði ferðin 209.990 krónur á mann. Til hafi staðið að flytja nemendurna með leiguflugi.

Ferðaskrifstofan hafi skilmála til verðbreytinga

Í ábendingu Tripical segir að kostnaður við leiguflug taki ávallt mið af eldsneytisverði á þeim degi sem flogið er og ferðaskrifstofan sé með heimild til verðhækkunar í skilmálum sínum.

Kemur þá einnig fram að hver útskriftarnemi hafi samþykkt slíka skilmála við bókun ferðarinnar.

„Tripical geri alltaf ráð fyrir einhverjum breytingum á verði, eins og eldsneyti og gengisbreytingum, þegar ferðir eru kynntar án þess að slíkar breytingar leiði til hækkunar á verði farmiða. Þær aðstæður sem undanfarið hafi verið uppi varðandi þróun á verði þotueldsneytis, séu hinsvegar langt fyrir utan það að vera eðlilegar markaðssveiflur.“

Sömu skilmálar eigi við hækkun og lækkun

Í niðurstöðu Neytendastofu kemur fram að meginreglan sé sú að verð samnings um pakkaferð skuli haldast óbreytt.

Heimilt sé að gera verðbreytingu, meðal annars vegna hækkunar á eldsneytisverði samkvæmt lögum, en slíkt sé skilyrðum háð.

Í skilmálum Tripical var ekki heimild til verðlækkunar á verði pakkaferða af sömu ástæðum og verðhækkun, en í þessu tilviki var það vegna breytinga á eldsneytiskostnaði. Komst þá Neytendastofa að þeirri niðurstöðu að Tripical hefði verið óheimilt að hækka verð ferðarinnar.