Útilegufólk lætur veðrið ekki á sig fá

Á tjaldsvæðinu í Hallormsstaðaskógi eru ekki margir, að sögn Bergrúnar Örnu Þorsteinsdóttur tjaldstæðisvarðar, en þó fleiri en hún hafði búist við í ljósi veðurspárinnar. 

„Skógurinn gefur mikið skjól svo vindurinn hefur ekki áhrif en það er búið að vera skýjað og napurt. Það var gott veður í byrjun vikunnar og þá voru líka fleiri á tjaldsvæðinu.“

Troðið í Þrastalundi

Tjaldsvæðið í Þrastalundi er troðið að sögn Sverris Einars Eiríkssonar tjaldstæðisvarðar. 

„Það mættu mjög margir í gær og við eigum von á talsverðum fjölda.“ 

Sverrir segir að í gær hafi verið „smá suddi“ í veðri, en góð stemmning í mannsskapnum. Það hafi nokkrir hópar verið að spila kubb frameftir kvöldi. 

Gestir komnir til að vera í Vaglaskógi

Ásmundur Smári Ragnarsson er tjaldstæðisvörður á tjaldsvæðinu í Vaglaskógi. Þar er, að hans sögn, slatti af fólki þrátt fyrir leiðinlegt veður. 

„Það bættust margir við í gær og flestir ætla að vera hér fram á mánudag.“

Á tjaldsvæðinu á Flateyri er óvenju rólegt þessa helgi að sögn tjaldstæðisvarðar, sem bendir á að flestir séu á þjóðhátíð. 

• Blogga um frétt