Mælingar staðfesta mun kröftugra gos
Setja bókamerki
Fyrstu mælingar vísindamanna Jarðvísindastofnunar á hraunrennsli eldgossins í Meradölum sýna fram á að það hafi numið 32 rúmmetrum á sekúndu fyrstu klukkustundirnar.
Í tilkynningu frá stofnuninni segir að gossprungan sé um 300 metra löng og liggi í norð-norðaustur upp í hlíðar vestasta Meradalahnjúksins, og um einum kílómetra norðaustur af megingígnum sem var virkur í gosinu í Fagradalsfjalli í fyrra.
Gosið hófst laust upp úr klukkan 13 eftir hádegi og var fyrst greint frá því á mbl.is.
Yfir suðurenda kvikugangsins
„Staðsetningin fellur vel að því að gossprungan liggi yfir suðurenda gangsins sem verið hefur að myndast í jarðskorpunni undanfarna daga.“
Flogið var yfir gosið og rúmmál hraunsins mælt klukkan 17.05 í dag. Þá voru teknar loftmyndir með Hasselblad-myndavél Náttúrufræðistofnunar úr flugvél Fisfélags Reykjavíkur, TF-204.
Gerð hafa verið landlíkön eftir þessum mælingum og þau borin saman við eldri gögn, að því er segir í tilkynningunni.
Ekki í röð aflmeiri gosa
Hraunið mældist um 74 þúsund fermetrar, meðalþykktin 5,9 metrar og rúmmálið 0,43 milljón rúmmetrar. Gosið hafði á þessum tímapunkti staðið í þrjá og hálfan klukkutíma.
Meðalhraunflæði fyrstu tímana telst vera 32 rúmmetrar á sekúndu, eða um 4-5 sinnum meira en var í byrjun gossins í fyrra.
„Gosið nú er því mun kröftugra, en telst þó ekki í röð aflmeiri gosa. Stefnt er að því að mæla helst einu sinni á dag til að byrja með og verða tölur uppfærðar um leið og niðurstöður berast.“
Fresta framkvæmdum við Landspítala
Illviðri gengur yfir landið í dag
Unnu eftir kröfugerð sem lögð var fram í upphafi
Mjög dýrt að tryggja landamærin
Erfiðara fyrir flokka að segjast hlutlausir
Hálfgerð martröð fyrir kosningastjóra
Vonast eftir breiðri þverpólitískri sátt
Óvissustig á mörgum vegum
