Innlent | mbl | 4.8.2022 | 14:26

Meradalir gætu fyllst á viku

Hraun rennur nú bæði til suðurs og norðurs. mbl.is/Arnþór Birkisson

Hraun gæti fyllt Meradali á um það bil viku ef framleiðnin helst í um 30 rúmmetrum á sekúndu. Þetta segir Þorvaldur Þórðarson eldfjallafræðingur í samtali við mbl.is.

Framleiðni er nú á bilinu 15 til 30 rúmmetrar á sekúndu; ef hún helst í 15 rúmmetrum á sekúndu gæti það tekið hraunið um 3 vikur að fylla Meradali.

Ef Meradalir fyllast verður að huga að innviðum, svo sem Suðurstrandarvegi, að sögn Þorvaldar.

Fulltrúar almannavarna funduðu ásamt jarðvísindafólki um stöðuna á Reykjanesskaga í morgun og var þar farið yfir ólíkar sviðsmyndir hvað varðar framhald gossins.

Frétt af mbl.is

Hættan er að hraun fari yfir Suðurstrandarveg

Þorvaldur segir mögulegt að hraun fylli Meradali á viku. mbl.is/Eggert Jóhannesson

Spurning hvaða leið hraunið velur – tvær líklegar

Hraun rennur nú bæði til suðurs og norðurs.

„Það er að hlaðast hraun í gilið norðan eða norðaustan við sprunguna. Ef það heldur áfram er líklegt að hraunið finni sér leið til norðurs eða jafnvel að Þráinsskildi,“ segir Þorvaldur, en svo nefnist umfangsmesta hraunið við Fagradalsfjall frá lokum síðasta jökulskeiðs, og er það í raun gríðarstór dyngja.

Hins vegar er komin hraunrás inn í Meradali og vellur hraunið yfir eldra hraunið frá gosinu 2021. „Síðan er bara spurning hvor þessara rása, sem eru að fara í andstæðar áttir, verður ráðandi varðandi dreifingu á hrauninu frá gígnum,“ segir hann.

Framleiðnin er meiri en í gosinu í Fagradalsfjalli árið 2021 og hefur framleiðnin haldist nokkuð jöfn, eða í 15 til 30 rúmmetrum á sekúndu. Hins vegar hefur sprungan dregist saman og orðin innan við 200 metrar á lengd en auk þess hefur virknin dregið sig á færri gíga.