Heilsugæslan rekin á hálfum mannafla

Nú eru 160 sérfræðingar í heimilislækningum starfandi á landinu og ekki allir í fullu starfi. Margrét Ólafía Tómasdóttir, læknir og formaður Félags íslenskra heimilislækna, FÍH, segir að það þurfi 300 lækna til að heilsugæslustöðvarnar séu fullmannaðar miðað við stærð þjóðfélagsins í dag.

Þetta kemur fram í Morgunblaðinu í dag, miðvikudag.

„Læknar vilja sinna sínum skjólstæðingum vel, einbeita sér að langveikum og hafa mikla eftirfylgni, enda er það ávinningur fyrir samfélagið og skilar sér í færri sjúkrahúsinnlögnum, færri komum á bráðamóttökur og færri tilvísunum til sérfræðinga, auk þess að auka lífsgæði og lífslíkur,“ segir Margrét.

2300-2500 manns á hvern heimilislækni

„Það er klárlega verið að keyra kerfið töluvert undirmannað. Hópur heimilislækna er lítill og margir eru nýlega komnir á aldur, þannig að við erum í mönnunarlegri lægð. Ég held að það séu um 160 sérfræðingar í heimilislækningum starfandi á landsvísu, og ekki allir í fullu starfi,“ segir Margrét.

Hún bætir við að í dag séu skráðir 2300-2500 manns á hvern heimilislækni. Samkvæmt rannsóknum sé eðlilegur fjöldi 1200-1500 skjólstæðingar.

Margrét segir að nauðsynlega þurfi sambærilegt mönnunarmódel og skilgreint hafi verið fyrir hjúkrunarfræðinga á sjúkrahúsum landsins, fyrir lækna.

„Nú er svo komið að mönnunin sem slík, bæði á heilsugæslunni og á Landspítalanum, er það lítil að það er alls ekki hægt að bæta meira álagi á læknana. Fólk er hreinlega að kikna undir álaginu á öllum sviðum innan heilbrigðiskerfisins.“

Margrét segir mikilvægt að það sé betur skilgreint hvað sé eðlilegt vinnuálag á vinnudegi lækna.

Meira má lesa um málið í Morgunblaðinu í dag.

Margrét Ólafía Tómasdóttir. Morgunblaðið/Sigurður Bogi