Ágætur afrakstur dúntekju í sumar

„Varpið hefur verið mjög gott um allt land og jafnvel yfir meðallagi,“ segir Margrét Rögnvaldsdóttir, formaður Æðarræktarfélags Íslands.

Margrét segir að afrakstur dúntekju hafi almennt verið ágætur hjá æðarbændum í sumar. „Á nyrstu stöðum, svo sem á Melrakkasléttu og á Skaga, hafa verið miklar rigningar og frekar kalt og þar hefur þetta hangið í meðaltalinu. En annars staðar láta menn mjög vel af varpinu.“

Formaðurinn segir það ánægjuefni að ekkert hafi orðið vart við fuglaflensu í æðarfugli á þeim stöðum sem skráðir eru með æðarrækt á Íslandi.

Þeir eru 382 talsins, líkt og sjá má á meðfylgjandi korti, en fyrr á árum voru um 500 staðir skráðir með æðarrækt. Æðarfugl verpir á fleiri stöðum en skráðir eru í dag en þeim er ekkert sinnt að sögn Margrétar.

Flestir bændur hafa nú þurrkað dúninn og sent hann frá sér í hreinsun, segir Margrét aðspurð. Búast má við því að meðalverð á æðardúni verði á bilinu 190-200 þúsund krónur á kílóið og hefur hækkað frá fyrra ári. Enn á þó eftir að reikna út verðið og verður það gert fyrir aðalfund Æðarræktarfélags Íslands síðar í þessum mánuði.

„Salan tók við sér í lok síðasta árs en árin þar á undan gekk illa og verðið hrundi. Í dag gengur vel að selja og verðið hefur hækkað,“ segir Margrét

Hún segir enn fremur að það færist í vöxt að vörur séu framleiddar úr æðardúni hér á landi í stað þess að selja dúninn beint úr landi sem hráefni. Meiri verðmæti eru í því að selja fullunna vöru og fleiri selja nú æðardúnssængur, -kodda, -húfur og -hálskraga, svo eitthvað sé nefnt, á netinu.