Innlent | Morgunblaðið | 15.8.2022 | 23:57

Hanna kjóla og mynda þá við eldstöðvarnar

Hjónin áður en haldið var af stað, með kjólinn að sjálfsögðu. mbl.is/Ari Páll

Hjónin Eva Poleschinski og Oliver Rathschueler frá Austurríki eru vægast sagt Íslandsvinir en hingað koma þau tvisvar á ári til þess að ferðast. Þau voru nýkomin úr hálendisferð þegar blaðamaður kom auga á hjúin við gönguleiðina að gosinu í Meradölum.

Þangað voru þau komin í þeim tilgangi að mynda kjól úr smiðju Poleschinski, enda starfar hún sem fatahönnuður á meginlandinu og Rathschueler sem ljósmyndari.

„Þessi er ein af okkar uppáhaldsmyndum,“ sagði Oliver meðan hann sýndi brot af því besta úr gosinu í Geldingadölum í fyrra en þau komu hingað í tvígang meðan gaus í fyrra: í apríl og júní. Ferðin í ár er þeirra fimmtánda hingað til lands og hér eiga þau góða vini.

Þau verða á ferðalagi í alls sex vikur. Má þar nefna lundaskoðun á Borgarfirði eystri, Grænlandsför, göngu um Hornstrandir og auðvitað ferð að eldgosinu í Meradölum mbl.is/Ari Páll

Allan daga á gosinu

Hjónin voru hugfangin af síðasta gosi og var því einstök heppni að þau skyldu vera einmitt hér á landi þegar byrjaði að gjósa, hvað þá með nýjan kjól í farteskinu.

„Hann tekur myndirnar og ég hanna fötin,“ sagði Eva létt í lundu og bætti við að það hefði aldrei verið spurning hvort þau færu að sjá hið nýja gos. „Við pökkuðum og komum á stundinni.“

Eva sagði að í fyrra, meðan gaus í Geldingadölum, hafi þau verið þar nánast „allan sólarhringinn“ í þeirra rúmu tveggja vikna för. „Fyrir okkur var þetta svo mikill innblástur. Nokkuð sem við höfðum aldrei séð eða upplifað áður.“ Ísland sé henni innblástur í hönnuninni.

Afrakstur ferðarinnar. Eva hannaði kjólinn og Oliver myndaði. Ljósmynd/Oliver Rathschueler

Hjónin verða á ferðalagi í alls sex vikur, sem hófst á akstri frá heimalandinu norður til Danmerkur, þar sem þau tóku Norrænu. Við tók lundaskoðun á Borgarfirði eystri, Grænlandsför, ganga um Hornstrandir og auðvitað ferð að eldgosinu í Meradölum.

„Við förum ekki fyrr en í lok ágúst þannig að það er nægur tími til að sjá það aftur.“

Uppáhalds mynd Olivers, sem þau tóku við eldgosið í Geldingadölum í fyrra: