Gunnar Aðalsteinsson leiðsögumaður varð hissa þegar tvær herþotur flugu yfir Vatnsdal um klukkan ellefu í morgun, er hann var að leiðbeina hópi kvenna í veiði.
„Við vorum tveir leiðsögumenn á mjög svipuðum stað í Vatnsdal og við vorum þarna bara í rólegheitum í frábæru veðri þegar við heyrðum allt í einu drunur og hávaða sem varð bara hærri og hærri.
Þá sáum við tvær herþotur sem flugu yfir okkur og var rosalegur hávaði,“ segir Gunnar í samtali við mbl.is.
„Þögnin var rofin og þetta var svolítið óþægilegt, af því að maður er þarna í algjörri þögn.“
„Ég fann að konunni sem var þarna með mér, henni leið ekkert vel, henni fannst þetta rosalega óþægilegt, og skiljanlega, maður var þarna í friði og ró í þessum fallega dal,“ segir Gunnar.
Bætir hann við að allir hefðu orðið hissa og fundist þetta svolítið skrýtið. Veiðistaðurinn er rétt fyrir neðan Hof í Vatnsdal.
„Þetta var svolítið sérkennilegt og svona eitthvað sem situr eftir í minningunni.“