Íbúð í Hafnarfirðinum stóð í ljósum logum

Mikill eldur stóð úr íbúð í fjölbýlishúsi við Víðivang í Hafnarfirðinum í dag en slökkvilið höfuðborgarsvæðisins var kallað út klukkan 14:17 vegna þessa. Engan sakaði í eldinum en slökkviliðið staðfestir í samtalið við mbl.is að enginn hafi verið inn í íbúðinni þegar að eldurinn braust út.

Að þeirra sögn gekk slökkvistarfið vel og tók stuttan tíma að slökkva í eldinum. Þá voru fjórir slökkviliðsbílar sendir á staðinn og um það bil sautján slökkviliðsmenn. Tveimur bílum var þó snúið við á leiðinni. Var búið að slökkva í eldinum klukkan 14:28, ellefu mínútum eftir að tilkynning barst.

Þegar slökkviliði bar að garði stóð íbúðin í ljósum logum. „Þetta var töluverður eldur þarna í einni íbúð og var farið að loga út um glugga þegar við komum.“

Slökkvilið höfuðborgarsvæðisins segir að þótt að enginn hafi verið inn í íbúðinni hafi þó verið nokkur hætta til staðar eins og er alltaf þegar eldur kemur upp í fjölbýlishúsi og var því mikilvægt að hafa hraðar hendur. Aðeins tók nokkrar mínútur að slökkva eldinn.

Ekki er enn vitað hver upptök eldsins voru en það sætir nú rannsókn.

Eins og má sjá var þó nokkur viðbúnaður á svæðinu. Ljósmynd/Aðsend

• Blogga um frétt