Viðbragðstíminn var „frábær“

Björgunarsveitin Suðurnes var aðeins átta mínútur á vettvang norður af smábátahöfninni í Reykjanesbæ eftir að útkall á hæsta viðbúnaðarstigi, F1, barst í morgun vegna vélarvana báts.

Frétt af mbl.is

Þyrlan kölluð út á mesta forgangi

Haraldur Haraldsson, formaður björgunarsveitarinnar, segir viðbragðstímann frábæran. Hann nefnir að þegar um hæsta viðbúnaðarstig sé að ræða hendi menn nánast öllu frá sér og fari strax af stað í björgunarsveitarhúsið.

Ljósmynd/Haraldur Haraldsson

Það var lán í óláni, bætir hann við, að báturinn varð vélarvana skammt frá þeim stað þar sem bátur björgunarsveitarinnar er staðsettur, eða á Grófinni í Keflavík.  

„Þetta hefði ekki getað farið betur,“ segir Haraldur um björgunaraðgerðirnar.

Ljósmynd/Haraldur Haraldsson

Báturinn hafði verið á makrílveiðum þegar hann byrjaði að reka hratt að landi og endaði hann á að reka upp í klettana utan við höfnina í Keflavík.

Ljósmynd/Haraldur Haraldsson

Einn maður var um borð og slasaðist hann ekki og í fyrstu virtist ekki hafa komið leki að bátum, að því er segir í tilkynningu frá Slysavarnarfélaginu Landsbjörg. Björgunarbáturinn Njörður kom á vettvang stuttu seinna og kom taug í bátinn og dró hann til hafnar, þangað sem hann var kominn klukkan rétt rúmlega tíu.

• Blogga um frétt