Launin hafi átt að vera allt að þrefalt hærri

Eigendur veitingastaðanna Flame og Bambus lögðu engin gögn fram á fundi með Fagfélögunum í dag sem sýndu fram á að misskilningur hefði getað valdið því að starfsmenn þeirra hefðu fengið vangreidd laun, líkt og Davíð Fei Wang, annar eigandi staðanna, hefur haldið fram.

Í raun kom ekkert frá eigendunum á fundinum í dag, að sögn Benónýs Harðarsonar, forstöðumanns kjarasviðs Fagfélaganna. Eigendur veitingastaðanna hafa verið sakaðir um stórfelldan launaþjófnað.

„Þetta var fundur sem þau báðu um en það kom ekkert frá þeim,“ segir Benóný í samtali við mbl.is.

Frétt af mbl.is

Fundað með Flame og Bambus í dag

Málið varðar starfs­menn sem komu hingað til lands frá Fil­ipps­eyj­um á veg­um vinnu­veit­anda. Talið er að þeir hafi unnið allt að sex­tán tíma á dag á lág­marks­laun­um, sex daga í viku. Hvorki hafi verið greitt vakta­álag, yf­ir­vinna né or­lof.

Vonar að ekki þurfi að fara dómstólaleiðina

Benóný segir Fagfélögin hafa lagt fram sína fyrstu útreikninga á fundinum í dag, en lögmaður eigendanna hafi óskað eftir nýjum fundi á miðvikudag þar sem þau ætli að fara nánar yfir málið. Það hafi verið samþykkt.

„Eins og þetta blasir við okkur þá hefðu launin átt að vera tvöfalt eða þrefalt hærri en þau voru. Það er útreikningur sem við stöndum við,“ segir Benóný.

Frétt af mbl.is

Grunur um stórfelldan launaþjófnað á Flame og Bambus

„Við leggjum mikla áherslu á að fólkið fái þau laun sem við teljum að það eigi inni. Það eru mánaðamót á miðvikudaginn og við vonumst til þess að klárist á miðvikudag eða fimmtudag, eða klárist sem allra fyrst svo fólk geti haldið áfram.“

Hann segir að annað hvort verði málið leyst þannig að fólkið fái greitt sem allra fyrst, eða dómstólaleiðin verði farin. „Ég vona að þetta þurfi ekki að fara þangað því þetta fólk er búið að bíða nógu lengi eftir því sem það á inni hjá þeim.“

• Blogga um frétt