„Sá sem syrgir hefur sannarlega elskað“

„Það er nauðsynlegt að ræða þessa hluti, sorgin er stór hluti af samfélaginu okkar,“ segir Stefnir Snorrason, varðstjóri hjá slökkviliði höfuðborgarsvæðisins.

Stefnir flutti erindið „Á vettvangi skyndilegs andláts“ á ráðstefnu Sorgarmiðsvöðvar sem stendur yfir til klukkan fjögur í dag.

Ráðstefnan er ætluð syrgjendum, aðstandendum og öllum þeim fagaðilum sem vinna að velferð þeirra. Fjallað er um skyndilegan missi frá mismunandi sjónarhornum, svo sem af vettvangi, á vinnustöðum og frá sjónarhorni aðstandenda.

„Það sem við finnum svo mikið fyrir þegar við komum á vettvang er „sá sem syrgir hefur sannarlega elskað“, sú setning hefur snert mig mjög,“ segir Stefnir í samtali við mbl.is.

Stefnir segir mikilvægt að hafa í huga hvernig hægt sé að hlúa betur að þeim sem missa ástvin skyndilega. mbl.is/Kristinn Magnússon

Enginn sem gengur í burtu óhreyfður

„Þegar þú finnur angist fólksins, það er enginn sem gengur í burtu óhreyfður frá slíku,“ segir hann.

„Mitt erindi snerist um að leiða aðstandendur og syrgjendur í gegnum hvaða ferli fer í gang þegar ég og mitt fólk komum á vettvang. Ef einstaklingur er úrskurðaður látinn á vettvangi, hvað tekur þá við?

Við erum alltaf að einblína á einstaklinginn sem við erum að sinna og ef við flytjum sjúkling í burtu þá missum við öll tengsl við aðstandendur, eins og gefur að skilja.“

Hann segir mikilvægt að hafa í huga hvernig hægt sé að hlúa betur að þeim sem missa ástvin skyndilega og það sé einnig það sem ráðstefnan snúist um.

• Blogga um frétt