43% hlynnt sölu bjórs á Laugardalsvelli

Minna en helmingur landsmanna er hlynntur sölu bjórs á landsleikjum Íslands í knattspyrnu á Laugardalsvelli og um þriðjungur er andvígur henni. Karlar eru líklegri en konur að styðja áfengissöluna og er yngra fólk sömuleiðis hlynntara sölunni en það eldra. 

Alls eru 43% hlynnt sölu bjórs á Laugardalsvelli, samkvæmt nýjum Þjóðarpúlsi Gallup. Þar kemur einnig fram að íbúar höfuðborgarsvæðisins séu hlynntari sölunni en íbúar landsbyggðarinnar.

Frétt af mbl.is

Miðasala tók kipp eftir fregnir um bjórsölu

Þá höfðu tekjur einnig áhrif á afstöðu fólks en einn af hverjum þremur í lægsta tekjuhópnum er hlynntur sölu bjórs á Laugardalsvelli á meðan tveir af hverjum þremur í hæsta tekjuhópnum eru það.

Um 57% fólks undir fertugu er hlynnt sölu bjórs á Laugardalsvelli á móti rúmlega fjórðungi fólks yfir sextugu.

Frétt af mbl.is

„Ekkert vesen“ á stuðningsmönnum þrátt fyrir bjór

Færri hlynntir sölu áfengis á skíðasvæðum

Þá virðist landinn mótfallnari sölu léttvíns og bjórs á skíðasvæðum, heldur en á landsleikjum í fótbolta, en samkvæmt Þjóðarpúlsinum eru einungis um 33% hlynntir slíkri áfengissölu og 41% andvígir. Um 27% landsmanna eru hvorki hlynntir né andvígir.

Breytur á borð við kyn, aldur og búsetu virtust einnig hafa svipuð áhrif á afstöðu fólks gagnvart áfengissölu á skíðasvæðum og bjórsölu á landsleikjum.

Ríflega fjórir af hverjum tíu körlum eru hlynntir sölu léttvíns og bjórs á skíðasvæðum á móti tæplega fjórðungi kvenna. Þá eru ríflega fjórir af hverjum tíu undir fertugu hlynntir sölu áfengis á skíðasvæðum á móti rúmlega fimmtungi fólks yfir sextugu.

Kjósendur Viðreisnar og Sjálfstæðisflokksins voru almennt hlynntari sölu áfengis á þessum svæðum en aðrir. Þá voru kjósendur Vinstri græn og Flokks fólksins mótfallnastir áfengissölunni.

• Blogga um frétt